मडगाव: घरगुती वादातून पतीने पत्नीचा खून केल्याची घटना फातोर्डा येथून समोर आली आहे. मूळ पश्चिम बंगाल येथील असलेले हे दाम्पत्य मुंगुल - फातोर्डा येथे वास्तव्यास होते. पोलिसांनी संशयित पतीला अटक केली आहे. बुधवारी (३० एप्रिल) रात्रीच्या सुमारास ही घटना घडली.

करिष्मा रॉय (२८) असे खून झालेल्या महिलेचे नाव आहे. तर, कृष्णा रॉय असे संशयित पतीचे नाव आहे. फातोर्डा पोलिसांनी संशयित कृष्णाला अटक केली आहे. कृष्णा सुतारकाम करतो. पती - पत्नीमध्ये विविध कारणांवरुन वारंवार खटके उडायचे. बुधवारी रात्री दोघांमधील वाद शिगेला पोहोचला. यातच राग अनावर झालेल्या पतीने पत्नीला गंभीर मारहाण केली व तिचा खून केला.

दक्षिण गोवा पोलिस अधीक्षक टीकमसिंग वर्मा यांनी दिलेल्या माहितीनुसार, मुंगुल - फातोर्डा येथील खून प्रकरणी संशयित पतीला अटक करण्यात आली आहे. अधिकचा पुढील तपास सुरु असल्याची माहिती त्यांनी दिली आहे. दरम्यान, मृत करिष्माचा मृतदेह शवविच्छेदनासाठी पाठविण्यात आला आहे.