Goa Crime News: मडकईतील व्हरडवाडा - गावणे बांदोडा येथील २०१७ मधील गाजलेल्या तनुजा नाईक खून प्रकरणातील संशयित आरोपी आतिश नाईक याला फोंड्यातील जिल्हा सत्र न्यायालयाने निर्दोष जाहीर केले.

आतिश हा तनुजाचा पती असून त्यानेच तनुजाचा खून केल्याच्या संशयावरून त्याला फोंडा पोलिसांनी ताब्यात घेऊन त्याची रवानगी तुरुंगात केली होती. गेली सहा वर्षे आतिश नाईक तुरुंगात होता, मात्र आता त्याची निर्दोष सुटका झाली आहे.

तनुजा व आतिश या दोघांचा प्रेमविवाह झाला होता. तनुजा ही मडगावातील एका महाविद्यालयात शिकत होती. तर आतिश हा कॅटरिंगचा व्यवसाय चालवत होता. मडगावात त्यांची ओळख झाल्यानंतर त्याचे रूपांतर प्रेमात झाले व नंतर दोघेही विवाहबद्ध झाली. विशेष म्हणजे या विवाहाला तनुजाच्या कुटुंबीयांचा विरोध होता.

गेल्या 3 जुलै 2017 मध्ये तनुजा आणि आतिश दोघेही व्हरडवाडा - गावणे येथील आपल्या घरी आले होते. मात्र संध्याकाळी तनुजा मृतावस्थेत सापडल्याने खळबळ उडाली होती. तनुजाचा मृतदेह खोलीत पडलेला होता, पण तिचा पती आतिश गायब झाला होता. त्यामुळे त्याच्यावरच संशयाची सुई होती, त्यानुसार फोंडा पोलिसांनी तपास केला असता, त्याला दुसऱ्या दिवशी ४ रोजी फोंडा बसस्थानकावर ताब्यात घेण्यात आले होते.

फोंडा पोलिसांनी या खुनाचा तपास करून न्यायालयात आरोपपत्र दाखल केले होते, मात्र सबळ पुराव्याअभावी आतिश नाईक याची निर्दोष सुटका करण्यात आली. न्यायाधीश चोलू गावस यांनी हा निवाडा दिला.

गुदमरल्याने मृत्यू...

तनुजा नाईक हिचा मृत्यू गुदमरल्याने झाल्याचे शवचिकित्सा अहवालात स्पष्ट झाले होते. तनुजाला गुदमरून मृत्यू येण्याजोगे नेमके काय घडले होते, ते स्पष्ट झाले नव्हते. तरीपण पोलिस तपासात उशी तोंडावर ठेवल्याने ती गुदमरली होती, असे पोलिस तपासात नमूद करण्यात आले होते. त्यातच तनुजाचा पती आतिश नाईक पळून गेल्याने हा प्रकार आतिशनेच केल्याचा दावा पोलिसांनी केला होता, मात्र याप्रकरणी प्रत्यक्षदर्शी उपस्थित नव्हता.