पणजी: काँग्रेसने (Goa Congress Party) आज सुरू केलेल्या सोशल मीडियावरील (Social Media) नव्या मोहिमेला सर्व स्तरातून लोकांचा जोरदार प्रतिसाद मिळत आहे. अवघ्या एका तासात ‘भाजपच्या लुटीविरुद्ध भारत’ हा ट्रेंड (Trend) देशभरात क्रमांक एकवर राहिला असून, सायंकाळी ४ वाजेपर्यंत या ट्रेंडला एक लाखाहून अधिक ट्विट (Tweet) मिळाले.

देशभरातील जनतेने सरकारविरुद्ध संताप व्यक्त करणारे हजारो व्हिडीओ सोशल मीडियावर अपलोड केले, असा दावा प्रदेश काँग्रेसचे प्रवक्ते अमरनाथ पणजीकर यांनी आज जारी केलेल्या पत्रकातून केला आहे.सत्तापिपासू आणि भांडवलदार धार्जिण्या सरकार विरोधात आवाज बुलंद करत लोकांनी आपल्या भावनांना वाट करून दिली. जानेवारी २०२१ पासून मोदी सरकार गॕस दरवाढ करीत आहे. गेल्या सात महिन्यांत प्रत्येक गॕस सिलिंडरमागे १९० रुपयांनी दरवाढ केली असून, हा आतापर्यंतचा उच्चांक आहे.

गेल्या आठ महिन्यांत ६७ वेळा इंधन दरवाढ करण्यात आली आहे. खाद्यतेलांच्या किमती ५० टक्क्यांनी वाढवल्या आहेत. वाढत्या महागाईमुळे गरीब जनता आणि मध्यमवर्गीयांना जगणे कठीण झाले आहे. काँग्रेस नेते राहुल गांधी यांनीही या विषयावर पत्रकार परिषद घेऊन जनतेवर ही प्रचंड भाववाढ लादून सरकार हा सर्व पैसा कुठे नेत आहे, असे अनेक प्रश्न केले आहेत, असेही या पत्रकातून सांगण्यात आले आहे.