Road Condition: फातोर्डाचे आमदार विजय सरदेसाई यांच्या उपस्थितीत आर्लेम सर्कल ते पॉवर हाऊस जंक्शनपर्यंतच्या 3.2 किलोमीटर (एका बाजूने) व 3.2 किलोमीटर पॉवर हाऊस ते आर्लेम जंक्शन (दुसऱ्या बाजूने) ईस्टर्न बायपासच्या हॉटमिक्सिंगच्या कामाचा शुभारंभ झाला. या कामावर 6.43 कोटी रुपयांचा खर्च येणार असून हे काम दीड ते दोन महिन्यांत पूर्ण केले जाईल.

यासंदर्भात बोलताना आमदार सरदेसाई यांनी सांगितले की, हा रस्ता फातोर्डा, कुडतरी, मडगाव व नावेली या चार मतदारसंघांतून जातो. तरीही आपण या रस्त्यासाठी प्रयत्न केले व सरकारकडून मंजुरी मिळवली. त्या दिवशी आपण मुख्यमंत्री डॉ. प्रमोद सावंत यांच्या भेटीला याच कामासाठी गेलो होतो.

मात्र, लोकांनी या भेटीबद्दल तर्कवितर्क व्यक्त केले. कुठल्याही आमदाराकडे काम करून घेण्याची कुशलता गरजेची असते. फेब्रुवारीच्या पहिल्या आठवड्यात पंतप्रधान नरेंद्र मोदी गोव्यात येणार आहेत. याच संधीचा फायदा घेत आपण या रस्त्यांच्या हॉटमिक्सिंगसाठी सरकारची मंजुरी मिळविली.