Goa Student: मुलांना व्यावहारिक शिक्षण गरजेचे; श्रीपाद नाईक

Goa Student: विद्यार्थ्यांवर चांगले संस्कार व्हावेत, याच हेतूने हेडगेवार शाळा राज्यात काम करत आहे. जेणेकरून पुढील पिढी सुशिक्षित होऊन समाजाचा व देशाचा विकास होईल. पुस्तकी शिक्षणाबरोबरच मुलांच्या यशस्वी जीवनासाठी व्यावहारिक शिक्षण फार महत्त्वाचे आहे, असे प्रतिपादन केंद्रीय राज्य पर्यटनमंत्री श्रीपाद नाईक यांनी केले.

वाळपई येथे कदंब बसस्थानक सभामंडपात वाळपईच्या डॉ. केशव बळीराम हेडगेवार शाळेच्या स्नेहसंमेलनात ते बोलत होते.

यावेळी विशेष आमंत्रित डॉ. हेडगेवार शिक्षण प्रसारक मंडळाचे सचिव सुभाष देसाई, वाळपई विभाग अध्यक्ष व व्यवस्थापक डॉ. अशोक आमशेकर, सचिव प्रकाश गाडगीळ, मुख्याध्यापिका निलांगी शिंदे, माध्यमिक विभाग पालक संघटनेचे अध्यक्ष प्रशांत मराठे, प्राथमिक विभागाच्या अध्यक्ष प्रियदर्शनी देसाई उपस्थित होत्या.

श्रीपाद नाईक म्हणाले, की शाळेने जी प्रगती दाखविली ती कौतुकास्पद आहे. नवीन संकुल निर्माण करण्याचे धाडसी काम वाळपईत केले आहे. हेडगेवार शाळेचा हाच वेगळेपणा आहे.

सुभाष देसाई म्हणाले की, हिंदू समाजात ताकद आहे, ती जीवंत ठेवली पाहिजे. काँग्रेसने संपूर्ण देश निधर्मी करून टाकला. त्यातून अनेक संकट निर्माण झाली. देश, धर्म संवर्धनासाठी अनेकांनी बलिदान दिले आहे. म्हणूनच अयोध्येत श्रीराम मंदिर स्थापन झाले आहे.

देश बलशाली होण्यासाठी पंतप्रधान नरेंद्र मोदी यांचे फार मोठे योगदान आहे. मात्र, आपलेच लोक हिंदू संस्कृतीला विरोध करतात, हे मोठे दुर्दैव म्हणावे लागेल.

यावेळी मुलांनी स्वागत गीत सादर केले. शिक्षिका दीप्ती चिमुलकर यांनी पाहुण्यांची ओळख करून दिली. स्वागत, प्रास्ताविक डॉ. अशोक आमशेकर यांनी केले. यावेळी वार्षिक विविध उपक्रमांत अव्वल ठरलेल्या मुलांना बक्षिसे देण्यात आली. कार्यक्रमात शेवटी ‘श्रीमंत योगी’ हे छत्रपती शिवाजी महाराजांच्या जीवनावरील महानाट्य मुलांनी सादर केले.