Calangute MLA Michael Lobo: उत्तर गोव्यातील सुप्रसिद्ध कळंगुट बीच परिसरात पर्यटकांची मोठी गर्दी असते. येथे पर्यटकांच्या सोयीसाठी अनेक लहानमोठी हॉटेल्स, रेस्टॉरंट्स आहेत. दरम्यान, येथील हॉटेल्सचालकांकडून खंडणी मागितल्याचे प्रकार उघडकीस येत आहेत. त्यामुळचे कळंगुटचे आमदार मायकल लोबो यांनी या प्रकरणी आज, मंगळवारी मुख्यमंत्री डॉ. प्रमोद सावंत यांची भेट घेतली.

या भेटीत आमदार लोबो यांनी कळंगुटमधील गैरप्रकार मुख्यंत्र्याच्या कानावर घालत कडक कारवाईची मागणी केली आहे. मायकल लोबो म्हणाले की, माझा मतदारसंघ असलेल्या कळंगुटमध्ये खंडणीखोरांचे एक रॅकेट कार्यरत आहे.

येथील सुप्रसिद्ध हॉटेल-रेस्टॉरंट व्यावसायिकांकडून खंडणी मागितल्याचे समोर आले आहे. या व्यावसायिकांनी घाबरून याची कुठेही वाच्यता केलेली नाही.

या व्यावसायिकांकडे प्रोटेक्शन मनीची मागणी काही गुंडांकडून केली जात आहे. भीतीपोटी या व्यावसायिकांनी मौन बाळगले आहे. एका हॉटेलचालकाने लेखी तक्रार दिली आहे. सध्या येथील सर्वच हॉटेल व्यावसायिकांमध्ये भीतीचे वातावरण आहे.

सध्या हा व्यवसाय करणाऱ्यांच्या पाठीशी उभारण्याची गरज आहे. आणि व्यावसायिकांना त्रास देणाऱ्यांना धडा शिकविण्याची गरज आहे, असे लोबो यांनी म्हटले आहे. दरम्यान, काही दिवसांपुर्वीच खुद्द आमदार लोबो यांच्याच हॉटेलमध्ये खंडणी मागितल्याचा प्रकार उघडकीस आला होता.