Tomato Price Hike : टोमॅटोच्या दरात मोठ्या प्रमाणात वाढ झाल्याने सर्वसामान्य नागरिकांचे जगणे कठीण झाले आहे. तुटपुंज्या पगारात संसाराचा गाढा चालवायचा कसा, असा प्रश्‍न निर्माण झाला आहे. फलोत्पादन महामंडळाच्या गाळ्यांवर ८० ते ९८ रूपये दराने टॉमेटोची विक्री होत होती. परंतु आता तेथेही दर वाढला असून १०८ रुपयांवर पोचला आहे.

वाढत्या महागाईची झळ सर्वसामान्य नागरिकांना बसू नये, त्‍यांना वाजवी दरात भाजीपाला मिळावा यासाठी गोवा सरकारने गोवा फलोत्पादन महामंडळाची स्थापना केली. तेथे बाजारापेक्षा कमी दरात भाजीपाला उपलब्ध होतो.

परंतु गेल्या काही दिवसांपासून फलोत्पादन केंद्रात कांदा आणि बटाटा वगळता इतर पालेभाज्या तसेच फळभाज्यांच्या दरात वाढ होत आहे. बाजारात जो टोमॅटो 120 रुपये प्रतिकिलो दराने उपलब्ध आहे, तोच टोमॅटो फलोत्पादन महामंडळाच्या गाळ्यांवर 108 रुपये किलो दराने विकला जातोय.

सरकारला गोरगरीब जनतेचे काहीच पडलेले नाही. टॉमेटो ही जीवनावश्‍यक वस्तू असून, त्‍याचे दर गगनाला भिडले आहेत. हे सरकार आपली जबाबदारी पार पाडण्यास अपयशी ठरले आहे. ‘अच्छे दिन’ म्हणत सत्तेत आलेल्या सरकारने जनतेला ‘बुरे दिन’ दाखविले आहेत.

सिसिल रॉड्रिगीस, ‘आप’च्‍या नेत्या

सरकार केवळ आपली खुर्ची सांभाळण्‍यात व्‍यस्‍त असून, सर्वसामान्‍यांच्‍या प्रश्‍‍नांकडे लक्ष द्यायला त्‍यांना वेळ नाही. सध्‍या टोमॅटोसह भाजीपाल्‍यांचे दर वधारले आहेत. सामान्‍य जनतेने जगावे कसे असा प्रश्‍‍न निर्माण झाला आहे. सरकारचे महागाईवर मुळीच नियंत्रण राहिलेले नाही.

उदय शिरोडकर, नागरिक