वाळपई: होंडा पंचायतीचे पंच सदस्य दीपक गावकर यांना मारहाण केल्याप्रकरणी दोघांना अटक करण्यात आली असून त्यात राहुल कुमार (बिहार, सध्या राहणारा होंडा-सत्तरी) व एस. मकंदर सक्तिवेल (तामिळनाडू, राहणारा होंडा) यांचा समावेश आहे.

अटक करण्यात आलेले दोघेही होंडा औद्योगिक वसाहतीत असलेल्या केम्प्लास्ट कंपनीत काम करतात. मारहाणीचे कारण अद्याप अस्पष्ट असून पोलिस तपास सुरू आहे. पोलिस स्थानकात मोठ्या प्रमाणात होंडा गावकरवाडा येथील ग्रामस्थ उपस्थित होते.

गुरुवारी दुपारी १ वाजण्याच्या सुमारास दीपक गावकर हे पंचायतीचे काम उरकून गावकरवाडा येथील आपल्या घरी जात असताना दोघांनी मोटारसायकलने जाऊन त्यांना अडवून मारहाण केली. त्यानंतर गावकर यांनी कसाबसा बचाव करत होंडा पोलिस आऊट पोस्टवर येऊन तक्रार नोंदवली. पोलिसांनी तत्काळ हालचाल करत दोघाही संशयितांना अटक केली.

या हल्ल्यात दीपक गावकर गंभीर जखमी झाले असून त्यांच्या डोक्यावर, मानेवर, पोटावर तसेच शरीराच्या इतर भागांवर जखमा झाल्या आहेत. या मारहाणीवेळी गावकर यांच्या गळ्यातील सोनसाखळी तुटून त्यातील मोठा भाग गायब झाला आहे.

पोलिस स्थानकांत ग्रामस्थांची धाव

घटनेची माहिती मिळताच होंडा व गावकरवाडा परिसरातील ग्रामस्थ मोठ्या संख्येने वाळपई पोलिस स्थानकात दाखल झाले व संशयितांना तातडीने अटक करण्याची मागणी केली. रितसर तक्रार दाखल झाल्यानंतर दोघांवर गुन्हा नोंद झाल्यानंतर अटक करण्यात आले आहे. या प्रकरणी पोलिस तपास सुरू आहे. अटक करण्यात आलेले दोघेही परप्रांतीय असून लोकप्रतिनिधीवर कोणतेही कारण नसताना हल्ला का करण्यात आला हे स्पष्ट झालेले नाही, असे पोलिसांनी सांगितले. यावेळी सरपंच शिवदास माडकर, इतर पंच सदस्य तसेच ग्रामस्थ मोठ्या संख्येने उपस्थित होते.