पणजी: हिंदू देवदेवता आणि सनातन धर्माचा अवमान करणाऱ्यांना त्वरित अटक करण्याच्या मागणीसाठी शनिवारी राज्यातील विविध हिंदुत्ववादी संघटनांनी पणजी पोलिस मुख्यालयासमोर जोरदार ठिय्या आंदोलन केले.

काँग्रेस नेते गिरीश चोडणकर, वॉरन आलेमाव आणि गोविंद शिरोडकर यांनी हिंदूंच्या धार्मिक भावना दुखावल्याचा आरोप करत त्यांना त्वरित गजाआड करण्याची मागणी यावेळी करण्यात आली. या आंदोलनात राज्यभरातून विविध संघटनांचे प्रतिनिधी मोठ्या संख्येने सहभागी झाले होते. यामध्ये नितीन फळदेसाई, शैलेंद्र वेलिंगकर, गोविंद चोडणकर, जान्हवी प्रभुदेसाई यांच्यासह अन्य मान्यवरांचा समावेश होता.

सकाळी आझाद मैदानावर जमून कार्यकर्त्यांनी हिंदू धर्माविरोधात सोशल मीडियावर अश्लील आणि आक्षेपार्ह टिप्पणी करणाऱ्यांचा निषेध केला. त्यानंतर प्रतिनिधी मंडळाने पोलिस उपअधीक्षक सुदेश नाईक यांची भेट घेऊन त्यांना मागण्यांचे निवेदन सादर केले. राज्यातील विविध पोलिस स्थानकांमध्ये यासंदर्भात तक्रारी दाखल असूनही पोलिस कारवाई करण्यास विलंब करत असल्याचा आरोप यावेळी करण्यात आला.

जर पोलिस माधव खट्टर आणि गौतम खट्टर यांना तत्परतेने अटक करू शकतात, तर मग हिंदू धर्माचा अवमान करणाऱ्यांना मोकळे का सोडले जात आहे? असा सवाल उपस्थित करत आंदोलकांनी सरकार आणि पोलिस प्रशासनाचा निषेध केला. ज्या तत्परतेने खट्टर बंधूंवर कारवाई झाली, तशीच कठोर कारवाई सनातन धर्माचा अपमान करणाऱ्यांवरही व्हावी, अशी मागणी करण्यात आली

स्वतंत्र तपास पथक नेमण्याची मागणी

यावेळी बोलताना नितीन फळदेसाई यांनी या प्रकरणात विशेष तपास पथक तयार करून हिंदू धर्माविरोधात होत असलेल्या बदनामीच्या प्रकरणांसाठी स्वतंत्र तपास पथक नेमावे, अशी मागणी केली. तसेच हिंदू देवदेवतांच्या आरतीची विटंबना केल्याप्रकरणी गिरीश चोडणकर यांना अटक करण्याची मागणी देखील करण्यात आली. तसेच आंदोलकांनी सनातनींना बाणावलीत प्रवेश देऊ नये असे प्रक्षोभक विधान केल्याबद्दल वॉरन आलेमाववर कारवाई आणि सर्वांमध्ये गोयच्या सायबाचा डीएनए आहे असे विधान करून धार्मिक तेढ निर्माण केल्याप्रकरणी गोविंद शिरोडकर यांना अटक करावी अशी मागणी देखील त्यांनी केली.