कांदोळी: मद्यधुंद अवस्थेत समुद्रात पोहण्यासाठी गेलेल्या पर्यटकाचा मृत्यू झाला आहे. मृत पर्यटक मूळ चंदीगडचा रहिवासी असल्याची माहिती आहे. दृष्टीच्या जीवरक्षकांनी पर्यटकाला रुग्णालयात दाखल केले पण, डॉक्टरांनी त्याला मृत घोषित केले. शनिवारी (दि. १९ ऑक्टोबर) कांदोळी समुद्रकिनाऱ्यावर ही घटना घडली.

दृष्टी जीवरक्षकांनी दिलेल्या माहितीनुसार, ३५ वर्षीय पर्यटक तीन मित्रांसोबत कांदोळी येथील समुद्रात पोहण्यासाठी गेला. सर्वजण समुद्रातून सुखरुप माघारी आले मात्र, एकजण माघारी येताच खाली कोसळला.

दृष्टीच्या जीवरक्षकांनी तात्काळ घटनास्थळी धाव घेत त्याला आवश्यक प्रथमोपचार दिले. त्यानंतर त्याला रुग्णालयात दाखल केले पण, डॉक्टरांनी त्याला मृत घोषित केले. मृत पर्यटक मद्यधुंद अवस्थेत असल्याची माहिती दृष्टीच्या जीवरक्षकांनी दिली आहे.

भिंतीवरून पडून एकाचा मृत्यू

दाबोळी येथे भिंतीवरुन पडून सुजल मरांडी (४५) या मूळ झारखंड येथील इसमाचा मृत्यू झाला. सध्या तो दाबोळी येथे राहत होता. त्याच्या निवासस्थानाजवळील भिंतीवर चढून काम करत असताना तोल जाऊन तो खाली पडला.

त्यास प्रथम चिखली येथे उपजिल्हा इस्पितळात व नंतर गोमेकॉत नेण्यात आले. तेथे त्याचा मृत्यू झाला. डोक्याला गंभीर दुखापत झाल्याने त्याचा मृत्यू झाल्याचे शवविच्छेदन अहवालात नमूद करण्यात आले आहे.