Goa Land Grab Case: मनी लाँड्रिंग आणि जमीन हडप प्रकरणातील मुख्य संशयित विक्रांत शेट्टीला उच्च न्यायालयाने मोठा दिलासा दिला. न्यायालयाने विक्रांतला 5 लाखांच्या जातमुचलक्यासह अटींवर सशर्त जामीन मंजूर केला.

बनावट कागदपत्रांच्या साहाय्याने जमीन हडप करुन इतरांना विकल्याप्रकरणी गुन्हे अन्वेषण विभागाच्या विशेष तपास पथकाने (एसआयटी) अनेक प्रकारच्या षडयंत्रांचा सूत्रधार असलेल्या विक्रांत शेट्टी याच्या विरोधात गुन्हा नोंदवत मुसक्या आवळल्या होत्या.

पोलिसांच्या आतापर्यंतच्या तपासामध्ये शेट्टी हा अनेक जमीन हडप प्रकरणांमध्ये सहभागी असून पोलिसांनी त्याला लक्ष्य करत चारी बाजूंनी फास घट्ट केला होता.

विशेष तपास सुरु केला होता

दरम्यान, खोट्या कागदपत्रांच्या साहाय्याने रिकाम्या जागा हडप करुन दुसऱ्यांना विकल्याच्या अनेक तक्रारी आल्यानंतर राज्य सरकारने गुन्हा अन्वेषण विभागाच्या मदतीने विशेष तपास पथक स्थापन करुन तपास सुरु केला होता. विविध पोलिस स्थानकांमध्ये अशा प्रकारच्या नोंद असलेल्या तक्रारी या एसआयटीकडे वर्ग करण्यात आल्या होत्या.

पोलिसांनी प्रत्येक प्रकरणाची स्वतंत्र चौकशी सुरु करुन संबंधित गुन्हेगारांचे अटक सत्र सुरु केले होते. यापूर्वी 18 जून 2022 रोजी एसआयटीने शेट्टीला अटक केली होती. याच प्रकरणात अभिलेखागार विभागातील दोन कर्मचाऱ्यांनाही अटक (Arrested) करण्यात आली होती.