पणजी : पंतप्रधान नरेंद्र मोदी यांच्या हस्ते सोमवारी पीएम केअर फॉर चिल्ड्रन योजनेअंतर्गत व्हिडीओ कॉन्फरन्सद्वारे लाभ जारी करण्यात आले. केंद्रीय मंत्री स्मृती इराणी, मंत्रिमंडळाचे इतर अनेक सदस्य, मुख्यमंत्री या कार्यक्रमात सहभागी झाले होते. मुलांसाठी गेल्यावर्षी सुरू केलेल्या पी एम केअर्स योजनेच्या लाभार्थ्यांशी पंतप्रधान नरेंद्र मोदी यांनी दूरदृश्य प्रणालीच्या माध्यमातून यावेळी संवाद साधला.

राज्यात कोरोना काळात अनाथ झालेल्या 6 बालकांना पीएम केअर्स फॉर चिल्ड्रन अंतर्गत किटचे वाटप करण्यात आले. उत्तर गोव्यात आदिती कळंगुटकर यांना आरोग्य, नगर विकास आणि महिला व बालकल्याणमंत्री विश्‍वजीत राणे यांच्या हस्ते मदतीचे कीट सूपूर्द केले. तर दक्षिण गोवा जिल्हाधिकारी कार्यालयात पार पडलेल्या कार्यक्रमात 5 बालकांना (2 मुली, 3 मुले) यांना जिल्हाधिकारी ज्योती कुमारी यांच्या हस्ते मदत देण्यात आली.

कुटुंबातील सदस्यासारखा आधार देणार

पीएम केअर्स किटमध्ये बालकांसाठी बँक पासबूक, आयुष्यमान भारत-पंतप्रधान जन आरोग्य योजनेअंतर्गत हेल्थ कार्ड आहे. कोरोनाचा फटका बसलेल्या या मुलांच्या आयुष्यात बदल घडवण्याचा पीएमकेअर्स हा छोटा प्रयत्न आहे. पंतप्रधान नरेंद्र मोदी यांनी अनाथ मुलांच्या पाठीशी उभे राहून त्यांच्या कुटुंबातील सदस्यासारखा आधार देण्याची ग्वाही दिली असून या मुलांना आयुष्यात पुढे जाण्याचे आवाहन याप्रसंगी मान्यवरांनी केले.