जांबोटी-चोर्ला मार्गावर संततधार पावसामुळे वाहतुकीत व्यत्यय येत आहे. येथील नदी-नाल्यांवर असलेले पूल जीर्ण झाले असल्याने बेळगावातून जांबोटी-चोर्लामार्गे गोव्याकडे जाणाऱ्या अवजड वाहनांना खानापूरमार्गे वळविण्यात आले आहे; तर चोर्ला घाटातील अवजड वाहतुकीवर बंदी घालण्यात आली आहे.

केवळ चारचाकी वाहनांना चोर्लामार्गे गोव्याकडे जाण्याची परवानगी देण्यात आली असून, सहाचाकी आणि त्यापुढील वाहनांना चोर्लाऐवजी अनमोड घाटमार्गे जाण्याची सूचना केली आहे. चोर्ला मार्गावरून गोव्यात दूध, भाजीपाला वाहतूक करणाऱ्या सहाचाकी वाहनांवरदेखील बंदी घालण्यात आली आहे.

चोर्ला मार्गावर अवजड वाहनांना बंदी घालण्यात आल्यानंतर बेळगाव शहर पोलिसांनी पिरनवाडी येथे बॅरिकेड्‍स उभारले आहेत. या ठिकाणी पोलिस बंदोबस्त ठेवण्यात आला असून, अवजड वाहनांना पुढे जाण्यास मज्जाव केला जात आहे. चोर्लामार्गे गोव्याकडे जाण्यासाठी येणाऱ्या वाहनचालकांना रस्ता बंद असल्याची माहिती देऊन खानापूर येथून अनमोडमार्गे गोव्याकडे वळविले जात आहे. एकही अवजड वाहन चोर्लामार्गे गोव्याकडे पाठविले जाऊ नये, अशी सक्त सूचना करण्यात आली आहे.