Chorla Ghat: चोर्लातील धोकादायक झाडांची प्रवासी वर्गात भिती

सत्तरी तालुक्यातील चोर्ला घाटात असलेली रस्त्यालगतची झाडे हटविण्याची गरज आहे. वादळी पावसावेळी रस्त्यालगतची झाडे कोसळून जीवितहानी होण्याची भिती प्रवासी वर्गात आहे.

चोर्ला घाटात मुसळधार पावसावेळी दरडी कोसळणे, झाडे कोसळणे या घटना याआधी घडलेल्या आहेत. दरडीची माती रस्त्यावर वाहून येण्याचे प्रकार याआधी झाले आहेत. २०२० घाटमाथ्यावर दरडी कोसळली होत्या. तेव्हा अनेकवेळा वाहतूक कोंडी होत होती. अशा घटना टाळण्यासाठी जुनी, मोडकळीस आलेली झाडे त्वरित हटवावी, अशी वाहनचालकांची मागणी आहे.

चोर्लात नेहमीच वाहतुकीला धोका संभवतो. ठिकाणी दरडी वारंवार कोसळत असतात, त्या ठिकाणी कायम स्वरूपी भक्कम मजबूत अशी संरक्षक भिंती बांधण्याची गरज आहे. केरी सत्तरी तपासणी केंद्राकडून चोर्ला घाटाला सुरुवात झाल्यावर घाटसंपेपर्यंत १८ किलोमीटरचा रस्ता आहे. या १८ किलोमीटरच्या मार्गात दरडी तसेच रस्त्यालगत धोक्याची झाडेही आहेत. ती झाडे हटविण्याची मागणी होत आहे.