डिचोली, उष्णतेचा पारा चढून उकाडा असह्य झाला आणि अंगाची लाही-लाही होऊ लागली, की प्रत्येकाला शीतल पाण्याचा थंडगार गारवा हवाहवासा वाटतो. अशावेळी मग प्रत्येकाला नदी, तलाव, बंधारे आदी जलस्रोत खुणावू लागतात.
यंदा तापमानात प्रचंड बदल होऊन उकाडा असह्य होऊ लागल्याने डिचोलीतील काही भागातील जलस्रोतांवर आंघोळीसाठी गजबजाट होत असल्याचे दिसून येत आहे. चिंतेची बाब म्हणजे आंघोळीसाठी असुरक्षित असलेल्या ''वाठादेव'' बंधाऱ्यावर चक्क लहान मुलांचा गजबजाट वाढत असल्याचे आढळून येत असून, मुलांच्या बंधाऱ्यावरील मुक्त वावराबाबतीत भीती व्यक्त होत आहे. सुरक्षेच्यादृष्टीने या बंधाऱ्यावरील लहान मुलांच्या वावरावर नियंत्रण येणे आवश्यक आहे.
डिचोली तालुक्यातील साखळी, कुडचिरे आदी काही ग्रामीण भागात जलस्रोत खात्यातर्फे लहान बंधारे बांधण्यात आले आहेत. त्यापैकी काही बंधारे आंघोळीसाठी आकर्षित करतात.
पंधरा वर्षांपासून वाठादेव बंधारा आंघोळीसाठी चर्चेत आला आहे. कारापूर-सर्वण पंचायत क्षेत्रात येणारा हा बंधारा आंघोळीसाठी तसा सुरक्षित नाही. या बंधाऱ्यातील पाण्याची पातळी खोल असून, ज्या ठिकाणी आंघोळ करतात, त्या पाण्यात पाणी खेचणारे मोठे पाईप आहे. बंधाऱ्यावर प्रतिबंधात्मक उपाययोजना करायला हव्यात, अशी स्थानिकांची मागणी आहे.
फॅमिली बंधाऱ्यावर
शाळांना सुटी पडल्याने सध्या लहान मुलांचा नियमित बंधाऱ्यावर गजबजाट असतो. विशेष करून रोलिंग मिल परिसरातील काही मुलांचा या बंधाऱ्यावर जास्त वावर असतो. अशी माहिती मिळाली आहे. रविवारच्या दिवशी काही फॅमिली विशेषतः महिला आपल्या मुलांना घेऊन बंधाऱ्याच्या खालच्या बाजूने सुरक्षित ठिकाणी आंघोळ करताना दिसून येतात.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.