Goa Accident : राज्‍यात अपघातांची मालिका सुरूच; दुचाकीवरील ताबा सुटल्याने दोन मित्रांनी गमावला जीव

Goa Accident: राज्‍यात अपघातांची मालिका सुरूच आहे. काल रविवारी रात्री मुंगूल-मडगाव येथे झालेल्‍या अपघातात दोन युवकांचा मृत्यू झाला. दालू कुजार (21) व जीवन सोरेन (17) अशी त्यांची नावे असून ते दोघेही मूळ झारखंडमधील आहेत. कोळंब-रिवण येथे ते राहत होते. ते दोघेही मित्र होते.

कोलव्‍याला दुचाकीवरून जात असताना त्‍यांचा ताबा सुटून त्यांच्या दुचाकीने प्रथम संरक्षक कठड्याला धडक दिली व नंतर वीजखांबाला जोरदार धडक दिली. रात्री सव्वाअकराच्या सुमारास हा अपघात घडल्‍याची माहिती फातोर्डा पोलिसांनी दिली.

घटनेची माहिती मिळाल्यानंतर, फातोर्ड्याचे पोलिस निरीक्षक नॅथन आल्मेदा यांच्या मार्गदर्शनाखाली पोलिसांनी त्वरित घटनास्थळी धाव घेतली. जखमींना १०८ रुग्णवाहिकेतून येथील दक्षिण गोवा जिल्हा इस्पितळात नेले असता तेथील डॉक्टरांनी त्यांना मृत घोषित केले. त्‍यांचे कुटुंब गोव्यात पोहोचल्यावर मृतदेहांची चिकित्सा केली जाणार आहे. उपनिरीक्षक अतिकेश खेडेकर पुढील तपास करीत आहेत.

घटनास्थळी हेल्‍मेट सापडले

अपघात झालेल्‍या ठिकाणी पोलिसांना हेल्मेट आढळून आले आहे. मृतांचे कुटुंब झारखंड येथे राहत असून त्यांच्या कुटुंबीयांशी संपर्क साधून पोलिसांनी अपघाताची माहिती दिली आहे. मृतदेह हॉस्‍पिसियो इस्पितळाच्या शवागारात ठेवले असून हळहळ व्‍यक्त होत आहे.