तांबडी सुर्ला: नवीन वर्षाचे स्वागत सहसा मध्यरात्रीच्या पार्ट्या आणि जल्लोषाने केले जाते. मात्र, या परंपरेला छेद देत तांबडी सुर्ला येथील ऐतिहासिक महादेव मंदिराच्या परिसरात शेकडो तरुणांनी गुरुवारी (दि.१ जानेवारी) पहाटे एकत्र येत 'आरोग्यदायी नववर्षाचा' संकल्प केला. संकेत आर्सेकर यांच्या कल्पनेतून आणि बजरंग दलाच्या वतीने आयोजित या उपक्रमाला युवकांचा उत्स्फूर्त प्रतिसाद लाभला.

शिस्त आणि आरोग्याची नवी पहाट

गुरुवारी १ जानेवारी रोजी पहाटे ठीक ६:०० वाजता या कार्यक्रमाची सुरुवात झाली. थंडीच्या गारव्यात महादेव मंदिराच्या पवित्र वातावरणात युवकांनी सूर्यनमस्कार, योगासने आणि ध्यानधारणा केली.

केवळ योगाभ्यासच नव्हे, तर 'मॉर्निंग रन'च्या माध्यमातून तरुणांनी आपल्या तंदुरुस्तीचा परिचय दिला. मध्यरात्री उशिरापर्यंत चालणाऱ्या पार्ट्यांऐवजी पहाटे उठून शिस्त आणि सकारात्मकतेने वर्षाची सुरुवात करण्याचा संदेश या निमित्ताने देण्यात आला.

सकारात्मक सवयींचा प्रसार

कार्यक्रमाचे आयोजक आणि संकेत आर्सेकर यांनी सांगितले की, "आजच्या तरुणाईला योग्य दिशा मिळावी आणि त्यांनी व्यसनांऐवजी आरोग्याकडे वळावे, हाच या उपक्रमाचा मुख्य उद्देश आहे. नवीन वर्षाची सुरुवात जर आपण निरोगी सवयींनी केली, तर संपूर्ण वर्ष उत्साहवर्धक जाते." बजरंग दलाच्या कार्यकर्त्यांनी या कार्यक्रमासाठी विशेष मेहनत घेतली होती

मानसिक शांततेसाठी ध्यानधारणा

महादेव मंदिराच्या शांत परिसरात योगासोबतच करण्यात आलेल्या ध्यानधारणेमुळे सहभागी तरुणांना मनःशांतीचा अनुभव घेता आला. शारीरिक आरोग्यासोबतच मानसिक आरोग्य जपणे किती महत्त्वाचे आहे, याचे मार्गदर्शन यावेळी करण्यात आले.

गोव्याच्या विविध भागांतून आलेल्या तरुणांनी या उपक्रमाचे कौतुक केले असून, भविष्यातही अशाच प्रकारचे कार्यक्रम राबवण्याचा मानस व्यक्त केला आहे.