गुजराती युवकाने फोंड्यात आत्महत्या करण्याचा प्रकार घडला असून रोजगाराच्या शोधात आलेल्या या युवकाने अपेक्षेप्रमाणे रोजगार मिळाला नसल्याने नैराश्यातून आत्महत्या केली असावी असा कयास त्याच्या कुटुंबियांनी पोलिसांकडे (Police) बोलताना व्यक्त केला. मूळ गुजरात (Gujarat) राज्यातील पण दोन महिन्यापूर्वी फोंड्यात रोजगाराच्या शोधात आलेल्या जोहराभाई सेंदाभाई भांगडा (Johrabhai Sendabhai Bhangra) वय 17 या युवकाने काल रविवारी रेटॉल हे विषारी द्रव प्राशन करून आत्महत्या केली. जोहराभाईचा भाऊ प्रभूनगर कुर्टी भागात राहतो. त्याच्याचकडे तो आला होता.

काही दिवसांपूर्वी त्याला फोंडयातील (Fonda) एका स्टील मार्ट दुकानात नोकरी मिळाली होती पण तो या नोकरीने खूष नव्हता. अधिक चांगल्या पगाराची त्याला अपेक्षा होती. काल रात्री त्याने आपला भाऊ व इतर सहकार्‍यांसमवेत जेवण घेतले मात्र त्याने नंतर उलट्या करण्यास सुरवात केल्याने त्याला सुरवातीला फोंडा आयडी उपजिल्हा इस्पितळात उपचारासाठी दाखल करण्यात आले. पण प्रकृती बिघडल्याने त्याला बांबोळी इस्पितळात पुढील उपचारासाठी दाखल करण्यात आले पण तेथे उपचार सुरु असताना जोहराभाईचे आज सोमवारी संध्याकाळी निधन झाले. मयत युवकाचे आई वडील गुजरातला असून मृतदेह बांबोळी शवागारात ठेवण्यात आला आहे. फोंडा पोलिस अधिक तपास करीत आहेत.