Goa Viral Video: गोव्यात पर्यटनाच्या नावाखाली येत काही पर्यटक उत्साहाच्या भरात नियमांना धाब्यावर बसवत चुकीचे कृत्य करत असतात. अशा घटना वारंवार समोर आल्या असून, पोलिस तसेच, पर्यटन विभागाकडून अशाप्रकारे चुकीच्या गोष्टी न करण्याचे आवाहन केले जाते. तरीही काहीजण चुकीची कृत्ये करतात.

नुकतेच काही पर्यटक रेन्ट कारच्या छतावर बसून नाचत असल्याचा व्हिडिओ समोर आला होता. त्यानंतर आता पर्यटकांचा एक ग्रुप कारच्या छतावर बसून स्टंट करतानाचा अजून एक व्हिडिओ समोर आला आहे.

कांदोळी येथील हा व्हिडिओ असून, यात रेन्ट कारच्या छतावर बसून काही तरूण स्टंट करताना दिसत आहेत. कांदोळी पर्यटक माहिती केंद्राजवळील ही घटना असून, कारच्या छतावर दोन तरूण आणि एक तरूण चालकाच्या बाजुला बाहेर उभा असल्याचे व्हिडिओत दिसत आहे. भरदिवसा हे पर्यटक नियम मोडताना दिसत असून, या पर्यटकांना पोलिसांचा धाक आहे की नाही? असा सवाल उपस्थित केला जात आहे.

दरम्यान, यापूर्वी अजून एक व्हिडिओ समोर आला असून, यात रेन्ट कॅबच्या छतावर दोन तरूण नाचताना दिसत आहेत. कारचे दोन्ही दरवाजे खुले ठेऊन दोघे छतावर नाचत आहेत, तर, कोणी तरी त्यांचा व्हिडिओ चित्रित करताना दिसत आहे. दरम्यान, याच घटनेचा व्हिडिओ येथील स्थानिकांनी देखील चित्रित केला. व्हिडिओमध्ये GA 03 AH 4948 ही महिंद्रा थार रेन्ट कॅब दिसत आहे.

व्हिडिओ समोर आल्यानंतर सध्या तो सर्वत्र व्हायरल होत आहे. पर्यटकांच्या या कृतीवर सर्व स्तरातून संतप्त प्रतिक्रिया समोर येत आहेत. लोकांनी पर्यटकांच्या कृतीचा निषेध केला आहे.