Group Clash In The Restaurant Parking Lot At Benaulim: पार्किंगच्या शुल्लक कारणावरून झालेल्या वादातून अलॉयसीस बार्रेटो या युवकावर लोखंडी सळीने हल्ला केल्याचा आरोप असलेला संशयीत सॅम्युअल मास्कारेन्हस याला चार दिवसांची पोलिस कोठडीत सुनावण्यात आली.

सोमवारी कोलवा पोलीसांनी न्यायलयात हजर केले असता पोलिस कोठडीत सुनावली असून चौकशी करण्याचा आदेश दिला.

या प्रकरणातील इतर तीन संशयित अजून फरारी असून पोलीस त्यांच्या शोधात असल्याची माहिती पोलिस निरीक्षक थेरन डिसोझा यांनी दिली.

संशयित सॅम्युअल हा दहा दिवसांच्या सुटीवर लंडनमधून गोव्यात आला होता. रविवारी तो परत जाणार असल्याने त्याने मित्रांसोबत पार्टी केली होती.

रात्री 2 वाजता हॉटेलच्या बाहेर सॅम्युअल आणि त्याच्या मित्रांचा दुसऱ्या एका गटाशी वाद झाला व याचे रुपांतर हाणामारीत झाले. यावेळी सॅम्युअलच्या गटातील एकाने विरुद्ध गटातील एकावर रॉडने वार केला.

यानंतर पोलिसांनी अधिक तपास केला असता या प्रकरणातील एक हल्लेखोर रविवारी दुपारी विमानाने लंडनला जाणार असल्याची माहिती मिळाली. संशयित सॅम्युअल मोपा विमानतळावर विमानात बसला असतानाच कोलवा पाेलिसांनी शिताफीने त्याच्या मुसक्या आवळल्या.

या हल्ल्यात ॲलोयसिस बार्रेटो हा करमणे येथील युवक गंभीर जखमी झाला असून, त्याच्यावर इस्पितळात उपचार सुरू आहेत.