मडगाव: गोव्यात बनविली जाणाऱ्या जगप्रसिद्ध अशा ग्रेटर डेन या जीनचे दिस्टीलर म्हणून लहान वयात किमया साधलेल्या जय धवन (26) यांचे काल रात्री कोलवा येथील समुद्रात बुडून निधन झाले. ही बातमी मद्य उद्योजक वर्तुळासाठी धक्कादायक आहे.

फातोर्डा येथे राहणारा हा उद्योजक युवक आपल्या मित्राचा वाढदिवस साजरा करण्यासाठी इतर मित्रांबरोबर काल कोलवा येथे आला होता. त्यानंतर रात्री तो आणि त्याचे आणखी दोन मित्र कोलवा आणि सेर्नाभाटी दरम्यानच्या एकेजागी समुद्र किनाऱ्यावर गेले असता रात्री साडे बाराच्या सुमारास जय याला समुद्रात आंघोळ करायची हुक्की आली. कोलवा पोलिसांनी दिलेल्या माहितीनुसार ज्यावेळी जय आंघोळ करण्यासाठी समुद्रात उतरला ती वेळ भरतीची होती. त्यामुळे पाण्याच्या लाटे बरोबर तो पाण्यात ओढला गेला.

यावेळी त्याचे अन्य दोन मित्र किनाऱ्यावर होते. त्यांनी हा प्रकार पाहिल्यावर त्यांनी तातडीने पाण्यात उतरून त्याला बाहेर काढले. लगेच 108 रुग्णवाहिका आणून त्याला हॉस्पिसियो इस्पितळात आणण्यात आले. मात्र तिथे त्याला मृत घोषित करण्यात आल्याची माहिती कोलवाचे पोलीस उपनिरीक्षक अजित वेळीप यांनी दिली.

धवन याचे नाव मद्य उद्योग जगतात प्रसिद्ध असून उच्चभ्रू पर्यटकाकध्ये लोकप्रिय असलेल्या ग्रेटर डेन आणि हापुसा जीन या मद्याचा दिस्टीलर म्हणून त्याने लहान वयातच नाव कमावले होते. रविवारी मडगावच्या जिल्हा इस्पितळात त्याच्या मृतदेहाची उत्तरीय तपासणी करण्यात आल्याची माहिती पोलिसांनी दिली