डिचोली: लोकशाहीत जनता 'सुप्रिम' आहे. असे मत गोव्याचे राज्यपाल पी. एस. श्रीधरन पिल्लई (P. S. Sreedharan Pillai) यांनी व्यक्त करतानाच खरा भारत ग्रामीण भागात दडला आहे. असे नमूद केले. वाठादेव-डिचोली (Bicholim) येथील केशव सेवा साधना विशेष शाळेला शुक्रवारी भेट दिल्यानंतर राज्यपाल श्री. पिल्लई बोलत होते.

यावेळी डिचोलीचे आमदार तथा सभापती राजेश पाटणेकर, मयेचे आमदार प्रवीण झांट्ये, डिचोलीचे उपजिल्हाधिकारी दीपक वायंगणकर, मामलेदार लक्ष्मीकांत कुट्टीकर, केशव सेवा साधना संस्थेचे सचिव नाना बेहरे, विशेष शाळेचे अध्यक्ष सागर शेट्ये, डॉ. गुरुप्रसाद कापडी, व्यवस्थापक मकरंद कामत आणि मुख्याध्यापिका संजना प्रभूदेसाई उपस्थित होत्या.

आदरणीय राज्यपाल श्रीधरन पिल्लई यांनी गोव्याची सूत्रे स्विकारल्यानंतर राजभवन आरटीआयखाली आणणे. हा ऐतिहासिक निर्णय आहे. असे सभापती राजेश पाटणेकर यांनी नमूद करून राज्यपाल श्रीधरन पिल्लई यांनी विशेष शाळेला भेट दिल्याबद्दल सभापतींनी समाधान व्यक्त केले. राज्यपाल श्रीधरन पिल्लई यांचे शाळेत आगमन होताच शाळेतर्फे त्यांचे भव्य स्वागत करण्यात आले. विशेष मुलांनी सादर केलेले योग पाहून राज्यपाल भारावून गेले.