Cashew Guaranteed Price नुकत्‍याच झालेल्‍या अर्थसंकल्पीय अधिवेशनात काजूची आधारभूत किंमत 125 रुपयांवरून 150 करण्‍यात आली. त्‍याचा लाभ जानेवारी ते मार्च या कालावधीत काजू विक्री केलेल्‍या शेतकऱ्यांना पूर्वलक्षी प्रभावानुसार मिळेल, अशी घोषणा मुख्यमंत्री डॉ. प्रमोद सावंत यांनी आज केली.

येथील कांपाल मैदानावर आयोजित केलेल्या दोन दिवसीय काजू महोत्सवाच्या उदघाटन कार्यक्रमात ते बोलत होते.

यावेळी मुख्यमंत्री म्हणाले की, काजूपासून नवनवीन उत्पादने कशी तयार करता येतील, हे पाहणे गरजेचे असून पर्यटकांना आकर्षित करण्यासाठी या महोत्सवाचे मोठे योगदान असेल.

गोवा वन विकास महामंडळामार्फत दरवर्षी राज्यस्तरीय काजू महोत्सव आयोजित करण्यात येणार आहे.

‘फेणी’ जीआय मानांकनाचे मद्य

काजूच्या बोंडूपासून बनवलेले ‘फेणी’ हे जीआय मानांकन प्राप्त असलेले देशातील एकमेव मद्य आहे. फेणीला राष्ट्रीय आणि जागतिक स्तरावर प्रसिद्धी मिळावी, यासाठी सरकारने प्रयत्न करणे गरजेचे आहे, असे आमदार डॉ. दिव्या राणे यावेळी म्हणाल्या.