मडगाव: दक्षिण गोव्यातील रिवण आणि कोळंब या जैवसंवेदनशील गावांजवळ पुन्हा एकदा खाणी सुरू करण्याचा डाव सरकारने आखला आहे. त्यामुळे पर्यावरणावर तर विपरीत परिणाम होणारच, शिवाय या भागांतून वाहणाऱ्या कुशावती नदी किनारी असलेल्या असंख्य बागायतींना फटका बसण्याची भीती व्यक्त केली जात आहे. त्यामुळे तेथील बागायतदार चिंतेत सापडले आहेत.

गोवा सरकारच्या खाण खात्याने १२ ऑगस्ट रोजी जारी केलेल्या निविदा सूचनेत उत्तर गोव्यातील होंडा येथील एक तर दक्षिण गोव्यातील कोडली आणि कुर्पे-सुळकर्णे या भागातील दोन अशा एकूण तीन खाणपट्ट्यांचा लिलाव जाहीर केला आहे. यातील कुर्पे-सुळकर्णे हा पट्टा रिवण आणि कोळंब या जैवसंवेदनशील गावांजवळ आहे. या भागात ज्या खाणी आहेत, त्या या दोन्ही गावांपासून सुमारे १२ किलोमीटर अंतरावर आतल्या भागात आहेत. हा भाग जैवसंवेदनशील क्षेत्रात असल्याने तिथे खाणी सुरूच कशा होऊ शकतात? असा सवाल स्थानिक बागायतदार करू लागले आहेत.

सरकारला या जैवसंवेदनशील गावांमध्‍ये पुन्हा खाणी का सुरू करायच्‍या आहेत तेच कळत नाही, अशी प्रतिक्रिया या भागातील बागायतदार व्यंकट प्रभुदेसाई यांनी व्यक्त केली. ते म्हणाले, या पट्ट्यात असलेली बद्रुद्दीन मवानी खाण कोळंब गावाला अगदी जवळ आहे. हा गाव यापूर्वीच जैवसंवेदनशील म्हणून जाहीर करण्यात आला आहे. तेथे कायद्यानुसार खाणी चालवता येत नाहीत.

पर्यावरण कार्यकर्ते शेतकरी राम वेळीप यांनीही हा खाणपट्टा पुन्हा सुरू केल्यास स्थानिक शेतकऱ्यांवर संकट येईल अशी भीती व्यक्त करून होणारा पर्यावरणीय ऱ्हास कित्येक पटीने अधिक असेल, असे सांगितले.

‘कुशावती’च्‍या गळ्‍याभोवती फास

रिवण आणि कोळंब येथील खाणी पुन्हा सुरू केल्यास या भागातील जीवनदायिनी असलेल्या कुशावती नदीवर विपरीत परिणाम होईल. यापूर्वी या नदीत खाणीमुळे मोठ्या प्रमाणावर मातीचा भराव शिरून नदीचे पाणी प्रदूषित होण्याबरोबरच या नदीचे पात्र उथळ बनले होते. मागची बारा वर्षे खाणी बंद असूनही हा गाळ कमी झालेला नाही. जर खाणी पुन्हा सुरू झाल्या तर कुशावतीचा गळा आणखी आवळला जाईल आणि या नदीच्या काठच्‍या बागायती नष्‍ट होतील.