पणजी: राज्य कर्मचारी भरती आयोगाकडून आणखी २१५ पदांसाठी जाहिरात प्रसिद्ध करण्यात आली आहे. त्यात सर्वात जास्त ‘एलडीसी’च्या १९७ जागा आहेत. या सर्व पदांसाठी उमेदवारांकडून केवळ ऑनलाइन अर्जच स्वीकारले जाणार असल्याचे आयोगाने स्पष्ट केले आहे.

उर्वरित रिक्त जागा ज्या भरल्या जाणार आहेत, त्यात ज्युनिअर असिस्टंटच्या १३, डेस्कटॉप पब्लिशिंग ऑपरेटरच्या ३, तर डेटा एन्ट्री ऑपरेटरच्या २ जागांचा समावेश आहे. ऑनलाइन अर्जांसाठी २ ऑक्टोबरची मुदत आयोगाने ठेवली आहे. सरकारच्या विविध सरकारी विभागांमधील ‘गट-क’ पदांसाठी ही जाहिरात काढण्यात आली आहे. परीक्षेची तारीख आयोगाचे संकेतस्थळ आणि वर्तमानपत्रात जाहिरातीद्वारे कळविली जाईल, असे आयोगाने नमूद केले आहे.

लिपिकाच्या सर्वाधिक १९७ जागा

लिपिकाच्या १९७ पदांचा विचार केला, तर त्यात खुल्या जागा १०९, ‘एसटी’साठी २५, ‘एससी’करिता ४, ‘ओबीसीं’साठी ४४, आर्थिक दुर्बल घटकांसाठी १५ जागा ठेवण्यात आल्या आहेत. याशिवाय यामध्ये २३ पदे ‘बेंचमार्क अपंगत्व’ असलेल्या व्यक्तींसाठी, १७ पदे माजी सैनिकांसाठी आणि १ पद गुणवंत खेळाडूंसाठी राखीव आहे.