पणजी: केंद्रीय गृहमंत्री अमित शहा हे दोन दिवस गोवा दौऱ्यावर असतील. शनिवारी रात्री ते गोव्यात येतील. रविवारी (ता. ६) सायंकाळी ४ वाजता त्यांच्या हस्ते भाजप भवनाचा लोकार्पण सोहळा होणार आहे, असे भाजपचे प्रदेशाध्यक्ष दामू नाईक यांनी सांगितले.
कार्यकर्त्यांच्या बळावर रायबंदर-चिंबल बायपास येथे उभारण्यात आलेल्या भाजप भवनाच्या लोकार्पण सोहळ्याला राज्यातील कार्यकर्त्यांनी आवर्जून उपस्थिती लावावी, असे आवाहन दामू नाईक यांनी केले. ते पक्ष कार्यालयात आयोजित पत्रकार परिषदेत बोलत होते. यावेळी प्रवक्ते सिद्धार्थ कुंकळकर आणि उत्तर गोवा जिल्हाध्यक्ष दयानंद कारबोटकर उपस्थित होते.
दरम्यान, भाजपची जी घोडदौड सुरू आहे, त्यासाठी अनेक ज्ञात-अज्ञात कार्यकर्त्यांचे योगदान दिले आहे. पक्षाकडून कोणत्याही तिकिटाची, पदाची अपेक्षा न करता राज्यातील सव्वाचार लाख सभासद कार्यरत असून, गोव्यातील भाजपच्या जडणघडणीत स्वर्गीय मनोहर पर्रीकर, श्रीपाद नाईक, राजेंद्र आर्लेकर, सतीश धोंड, दत्ता खोलकर, लक्ष्मीकांत पार्सेकर आदींनी महत्त्वपूर्ण योगदान दिले आहे. शहा हे सोमवारी सायंकाळी ५ वा. ते गोव्यातून प्रस्थान करतील.
वचनपूर्तीसाठी सरकारचे अभिनंदन
भाजपच्या जाहीरनाम्यात वर्षाला तीन सिलेंडर मोफत देण्यात येतील, अशी घोषणा करण्यात आली होती. ती घोषणा सरकारने गोवा उज्ज्वला योजना राबवत पूर्ण केली आहे.
या योजनेच्या अर्जाची प्रक्रिया अतिशय सुटसुटीत करण्यात आली आहे. गोमंतकीयांना दिलासा देणारी ही योजना अंमलात आणल्याबद्दल मुख्यमंत्री डॉ. प्रमोद सावंत आणि मंत्रिमंडळाचे मी अभिनंदन करतो, असे दामू नाईक यांनी सांगितले.
