वाळपई: मराठीला अभिजात भाषेचा दर्जा देऊन केंद्र सरकारने उत्तम कार्य केले आहे. आणि म्हणूनच आज मराठीसाठी ज्यांनी योगदान दिले त्यांचा आम्ही सन्मान सोहळा आयोजित केला आहे. आता मराठीची चळवळ पुढे न्यायची असून मराठीला राजभाषा करणे हे राज्य सरकारचे आद्य कर्तव्य आहे, असे प्रतिपादन साहित्यिक आणि गोमंतक मराठी साहित्य परिषदेचे अध्यक्ष संदीप केळकर यांनी केले.

ब्रह्मकरमळी-सत्तरी येथील श्री ब्रह्मदेव देवस्थान सभागृहात ब्रह्मदेव युवक संघ आणि गोमंतक मराठी साहित्य परिषद यांच्या संयुक्त विद्यमाने मराठी भाषेला अभिजात भाषेचा दर्जा मिळल्याचे औचित्य साधून आयोजित मराठीसाठी योगदान देणाऱ्यांच्या सन्मान सोहळ्यात ते बोलत होते.

यावेळी माजी उपसभापती नरहरी हळदणकर, ब्रह्मदेव युवक संघ ब्रह्माकरमळीचे अध्यक्ष प्रसाद खाडिलकर, पंचायत सदस्य संध्या खाडिलकर, सखाराम देसाई, वामनराव देसाई, मिलिंद गाडगीळ, ॲड शिवाजी देसाई, विश्वनाथ पिंगुळकर, संजीव बर्वे, प्राजक्ता गावकर आदी मान्यवर उपस्थित होते. या कार्यक्रमात ॲड. शिवाजी देसाई, विश्वनाथ पिंगुळकर, संजीव बर्वे, वामनराव देसाई, प्राजक्ता गावकर,श्री शांतादुर्गा दांडिया ग्रुप ब्रह्मकरमळीच्या वतीने कु. दिप्ती धुरी आदींचा माजी उपसभापती नरहरी हळदणकर आणि संदीप केळकर यांच्या हस्ते शाल, श्रीफळ देऊन सन्मान करण्यात आला. नरहरी हळदणकर म्हणाले की, अभिजात भाषा मराठी झाल्याने मराठीप्रेमींत चैतन्य पसरले आहे.