पोर्तुगीजांच्या राजवटीविरुद्ध गोवेकरांनी आपला लढा दिल्यावर गोव्याची पारतंत्र्यातून सुटका झाली. गोवा मुक्‍तीच्‍या 25 वर्षांनंतर 1987 मध्ये दिवंगत पंतप्रधान राजीव गांधी यांच्‍या काळात गोव्‍याला घटक राज्‍याचा दर्जा मिळाला. त्‍यानंतर राज्‍याला खऱ्या अर्थाने स्‍वायत्तता लाभली. निर्णय घेण्याचे स्‍वातंत्र्य मिळाले. विधानसभा अस्‍तित्‍वात येऊन आमदारांची संख्या वाढली. तसेच एक राज्‍यसभा खासदारपदासह दोन लोकसभा खासदार लाभले. गेल्‍या 35 वर्षांत गोव्‍याचा अनेक अंगांनी विकास झाला.

गोवा मुक्तीनंतर 'गोमन्तक' हे पहिले वृत्तमाध्यम गोव्यात उभे राहिले. गोमन्तकने आजवर राजकीय, सामाजिक, शैक्षणिक, आरोग्य अशा सर्वच क्षेत्रात भरीव कामगिरी करत मोलाचे योगदान दिले आहे. परखड आणि स्पष्ट पत्रकारीतेच्या माध्यमातून गोव्यातील जनसामन्यांच्या समस्या मांडून त्यांना न्याय मिळवून देण्यात मदत केली आहे.

याच योगदानाबद्दल गोवा घटक राज्य दिनानिमित्त राजभवन येथे आयोजित कार्यक्रमात गोमन्तक समूहाचा सत्कार करण्यात आला. गोमन्तकचे संपादक संचालक राजू नायक यांनी हा सन्मान स्वीकारला.

केंद्रिय मंत्री श्रीपाद नाईक यांच्याहस्ते हा सत्कार करण्यात आला. यावेळी सोबतच राज्यपाल पी. एस. श्रीधरन पिल्लई, मुख्यमंत्री प्रमोद सावंत, सभापती रमेश तवडकर, मच्छीमार मंत्री निळकंठ हळर्णकर, कृषीमंत्री रवी नाईक, वाहतूक मंत्री माविन गुदिन्हो, पर्यटन मंत्री रोहन खंवटे, सहकारमंत्री सुभाष शिरोडकर, वीजमंत्री सुदिन ढवळीकर, व समाज कल्याण मंत्री सुभाष फळदेसाई इ. मंत्री उपस्थित होते.