Goa Three New Railway Stations Controversy Konkan Railway Clarification

सासष्टी: गोव्यात प्रस्तावित तीन नवी रेल्वे स्थानके बांधण्यासंदर्भात लोकांमध्ये गैरसमज पसरवला जात आहे. ही रेल्वे स्थानके सां जुझे द आरियल, नेवरा व मये येथे प्रस्तावित आहेत. या भागातील लोकांनी या रेल्वे स्थानकांना आपला विरोध दर्शविण्यास सुरवात केली आहे. त्यामुळे रेल्वे प्रशासनाने स्पष्टीकरण दिले असून ही रेल्वे स्थानके व्यवहार्य (ऑपरेशनल) कार्यक्षमता सुधारण्यासाठीच या तीन नवीन रेल्वे स्थानकांची आवश्यकता असल्याचे म्हटले आहे.

केवळ कोळसा (Coal) वाहतुकीसाठीच या रेल्वे स्थानकांची उभारणी केली जात आहे असे लोकांचे म्हणणे आहे. आम्हाला लोकांची चिंता माहीत आहे. मात्र ही नवीन रेल्वे स्थानके व्यवहार्य कार्यक्षमता सुधारण्यासाठी आहेत. कोकण रेल्वे मार्गावर रेल्वे वाहतूक वाढली आहे. शिवाय सुटीत खास रेल्वे गाड्या सोडल्या जात आहेत. त्यामुळे काही रेल्वे गाड्यांना विलंब होत असतो. हे सर्व टाळण्यासाठी या तीन रेल्वे स्थानकांचा वापर केला जाणार आहे, असे म्हटले आहे.

कोकण रेल्वेचे म्हणणे

या स्थानकांचा वापर प्रवासी किंवा मालवाहतूक हाताळण्यासाठी नाहीत, असे कोकण रेल्वे कॉर्पोरेशनचे सर व्यवस्थापक बबन घाटगे यांनी सांगितले.

सध्या कोकण रेल्वेच्या (Konkan Railway) दोन रेल्वे स्थानकांमध्ये १७ कि.मी. अंतर आहे. त्यामुळे ट्रेन क्रॉसिंगसाठी अडचण भासत आहे, असे त्यांचे म्हणणे आहे.

या रेल्वे स्थानकांचा उपयोग केवळ रेल्वे ट्रेनच्या क्रॉसिंगसाठी वापर केला जाईल. प्रवासी किंवा मालवाहतुकीसाठीच्या रेल्वे स्थानकांसाठी जास्त जागेची आवश्यकता लागते. शिवाय रस्ते, माल ठेवण्यासाठी शेड, देखरेख व्यवस्था आवश्यक असते, असेही घाटगे यांनी स्पष्ट केले.