Goa Industries: राज्‍यातील औद्योगिक वसाहतींमध्‍ये दर महिन्‍याला २५ तास वीज खंडित होणार असे वीज खाते कळवते, पण प्रत्यक्षात ४० तास वीज खंडित करते. याचा फटका औद्योगिक उत्पादकता व उत्पादनांवर होतो, अशा शब्‍दांत उद्योजकांनी चिंता व्यक्त केली. ही स्‍थिती केवळ वेर्णा औद्योगिक वसाहतीपुरती मर्यादित नाही तर राज्यभरातील औद्योगिक वसाहतींमध्‍ये हेच चित्र असल्याचे उद्योजकांचे म्हणणे आहे.

गोवा चेंबर ऑफ कॉमर्सच्या उत्पादकता आणि औद्योगिक विकास समितीच्या बैठकीत याबाबत चर्चा करण्‍यात आली. या बैठकीला समितीचे अध्यक्ष गौतम राज, सहअध्यक्ष नितीन देसाई, सदस्य डॉ. जेनिफर लेविस कामत, चेंबरचे महासंचालक संजय आमोणकर, संचालक किरण बाळ्ळीकर यांच्‍यासह मान्‍यवर उपस्थित होते. जनित्रांच्या माध्यमांतून वीजनिर्मिती केली तर २५ रुपये प्रतियुनिट खर्च येतो. प्रश्‍‍न सोडवण्यासाठी उद्योजकांचे गट स्थापन करण्याच्या संकल्पनेवरही विचार कऱण्यात आला. किमान पाच उद्योजकांनी गट स्थापन कऱण्याचे ठरविण्यात आले.

कचऱ्यासाठी मोठे शुल्क

घातक कचऱ्याची विल्हेवाट लावण्याची जबाबदारी असलेल्या ‘फोंडा एन्व्हार्यो केअर’कडून अवाजवी शुल्क आकारले जात असल्याची बाबही बैठकीत चर्चेला आली. गोवा राज्‍य प्रदूषण नियंत्रण मंडळाने गोवा चेंबरला पत्र पाठवून सदस्य उद्योजकांना हा कचरा ‘फोंडा एन्व्हार्यो केअर’ या आस्थापनाकडे पाठवावा अशी सूचना केली आहे. त्या पत्राच्या अनुषंगाने झालेल्या चर्चेवेळी हा मुद्दा समोर आला. सदर शुल्‍क राज्याबाहेरील कंपन्यांपेक्षा जास्त आहे.