मांद्रे: सध्या गोव्यात येणारे पर्यटक आणि स्थानिकांमध्ये बराच संघर्ष पाहायला मिळतोय. शुक्रवारी (दि. २१) रोजी जुनासवाडा-मांद्रे येथे घडलेल्या एका प्रकरणात मारियाफेलिझ फर्नांडिस नामक एका स्थानिक महिलेचा दुर्दैवी मृत्यू झाला आहे. पाळीव कुत्र्यांच्या वाढलेल्या उपद्रवामुळे दिल्लीमधील रहिवासी आणि स्थानिक महिला यांच्यात संघर्ष झाला, त्यानंतर एक गाडी येऊन महिलेला धडकली आणि तिचा मृत्यू झाला.

मिळालेल्या माहितीनुसार, मारियाफेलिझ ही महिला शहाळ्याची विक्री करून घर चालवायची. त्यांच्या घराजवळ एक दिल्लीतील कुटुंब कुत्र्याला फिरवायला घेऊन यायचं. दिल्लीमधील राशिवाशांचा कुत्रा आणि मारियाफेलिझ यांच्या दोन कुत्र्यांमध्ये भांडण व्हायचे आणि हीच रोजची कटकट नको म्हणून मारियाफेलिझ आणि त्यांच्या मुलाने दिल्ल्लीतील कुटुंबाला त्यांच्या कुत्र्याला आवर घालायला सांगितलं होतं.

याप्रकरणातून त्यांच्यात भांडण जुंपलं आणि दिल्लीतील कुटुंबाने मारियाफेलिझ हिला केसांना पकडत खाली ढकललं, मारियाफेलिझ हीच मुलगा मदतीला धावून आला आणि स्थानिकांच्या मदतीने त्यांनी तिला खुर्चीवर बसवले.

या वादानंतर दिल्लीतील कुटुंब कुत्र्याला घेऊन निघून गेले असता एक गाडी भरधाव वेगाने मारियाफेलिझ हिच्या दिशने आली आणि तिला धडक दिली. या गाडीची धडक जबरदस्त असल्याने मारियाफेलिझ हिला गाडीने दहा मीटर अंतरावर फरफटत नेले, गाडीचे चाक अंगावरून गेल्याने महिलेचा मृत्यू झाला. ही संपूर्ण घटना सीसीटीव्हीमध्ये कैद झाली आहे.

या घटनेनंर स्थानिकांनी पोलीस स्थानकाबाहेर जमाव केला. गाडीचालकाने पोलिसांजवळ आत्मसमर्पण केले आहे आणि दीपन राजू बत्रा याच्यावर पोलिसांनी गुन्हा दाखल करत अटक केली आहे. या प्रसंगामुळे स्थानिक कठोर कारवाईची मागणी करत आहेत. पर्यटक आणि स्थानिकांमधील हा किनारी वाद आता शिगेला पोहोचला आहे.