World Tribal Day ऑगस्ट हा ‘जागतिक आदिवासी दिन’ म्हणून जगभरात साजरा केला जातो. गोव्यातही या दिवशी विविध आदिवासी संघटनांनी ठिकठिकाणी कार्यक्रमांचे आयोजन केले आहे.

तसेच राज्य सरकारच्यावतीने एका कार्यक्रमाचे आयोजन ऑल इंडिया आदिवासी संघटनेच्या सहयोगाने गोवा अनुसूचित जाती-जमाती आयोगाने केले आहे.

प्राप्त माहितीनुसार, उटा संघटनेने आपला कार्यक्रम मिनेझिस ब्रागांझा हॉलमध्ये बुधवार, ९ रोजी दुपारी ३ वाजता आयोजित केला असून त्यास कला-संस्कृती मंत्री गोविंद गावडे मुख्य अतिथी म्हणून उपस्थित राहणार आहेत.

ऑल इंडिया आदिवासी एम्प्लॉईज फेडरेशन (गोवा) शाखेने दोन दिवसीय राष्ट्रीय परिषदेचे आयोजन केले असून त्या परिषदेचे उद्‌घाटन गोवा अनुसूचित जाती-जमाती आयोगाने रवींद्र भवन, मडगाव येथे राज्यस्तरीय कार्यक्रमात संध्याकाळी ५ ते रात्री ८ वा.दरम्यान होणार असल्याचे कळविले आहे.

या कार्यक्रमात गोव्यासहित बारा राज्यांतील आदिवासी अधिकाऱ्यांचा सत्कार होणार असल्याचे गोवा अनुसूचित जाती-जमाती आयोगाचे अध्यक्ष व ऑल इंडिया आदिवासी एम्प्लॉई संघटनेच्या संयुक्त पत्रकार परिषदेत जाहीर केले होते.

या दोन दिवसीय परिषदेतील जनजागृती कार्यक्रमाचे नियोजन जनजाती आयोगाने केले आहे तर यात अभियोक्ता संचालनालय, पोलिस खाते, जिल्हाधिकारी खाती सहभागी होणार आहेत.

दरम्यान, या कार्यक्रमाचे यूट्यूबवरून प्रसारण होणार असल्याने भारतभरातील आदिवासींचे या कार्यक्रमावर लक्ष असणार आहे.

परिषदेला देशभरातून प्रतिसाद

कर्मचारी संघटनेच्या राष्ट्रीय परिषदेस उत्स्फूर्त प्रतिसाद लाभला असून अकरा राज्यांतील तीनशेहून अधिक प्रतिनिधी मडगाव येथे दाखल झाले आहेत. शेजारच्‍या महाराष्‍ट्रातील चंद्रपूर, भंडारा, गडचिरोली भागातून लोक येत आहेत.

पारंपरिक वेशभूषेत गोव्याच्या दिशेने निघालेल्या प्रतिनिधींचे ग्रुप फोटो आदिवासी समाजमाध्यमांवर व्हायरल झाले आहेत.