पणजी: सुनंदा येत्रेकरची शानदार अष्टपैलू चमक, कर्णधार शिखा पांडे हिचा धारदार मारा या बळावर गोव्याच्या महिलांनी गुरुवारी सलग चौथ्या विजयाची नोंद केली. सीनियर टी-20 क्रिकेट स्पर्धेत त्यांनी बिहारला पाच विकेट आणि तब्बल 8.5 षटके राखून हरविले.

(Goa women's team defeated Bihar's team in senior T20 cricket tournament)

गोव्याचा हा सहा लढतीतील चौथा विजय ठरला, त्यामुळे त्यांचे 16 गुण झाले आहेत. स्पर्धेतील शेवटचा साखळी सामना शनिवारी (ता. 22) मध्य प्रदेशविरुद्ध होईल. गुवाहाटी येथील अमिनगाव क्रिकेट मैदानावर गोव्याने बिहारचा डाव अवघ्या 47 धावांत गुंडाळला, नंतर 11.5 षटकांत 5 विकेट गमावून सामना जिंकला.

बिहारच्या डावाला सुरुंग लावताना शिखाने 10 धावांत 3 विकेट टिपल्या. अनुभवी सुनंदाने 15 धावांच्या मोबदल्यात दोघींना माघारी धाडले.

नंतर सहाव्या षटकात गोव्याची 4 बाद 21 धावा अशी घसरगुंडी उडाली असता सुनंदाने नाबाद 16 धावा करत गोव्याच्या विजयाच मोलाचा वाटा उचलला.

संक्षिप्त धावफलक

बिहार: १९.५ षटकांत सर्वबाद ४७ (अपूर्वा कुमारी ११, प्रगती सिंग १५, शिखा पांडे ४-१०-३, निकिता मळीक २-७-१, सुनंदा येत्रेकर ४-१५-२, पूर्वा भाईडकर ४-३-०, रुपाली चव्हाण ४-७-१, तेजस्विनी दुर्गड १.५-२-०) पराभूत वि. गोवा ः ११.१ षटकांत ५ बाद ४८ (पूर्वजा वेर्लेकर १२, संजुला नाईक ३, शिखा पांडे ०, विनवी गुरव १०, तेजस्विनी दुर्गड २, सुनंदा येत्रेकर नाबाद १६, श्रेया परब नाबाद ०, अपूर्वा ३-११, अपूर्वा कुमारी १-११, पी. प्रिया १-१२).