मडगाव: जंगलात काजू बागायतीत साफसफाईसाठी गेला असता रान‌डुकराने केलेल्या हल्ल्यात राम गोविंद गावकर (५९) या इसमाला आपला प्राण गमवावा लागला. बेदुर्डे येथे काल रविवारी ही दुर्दैवी घटना घडली.

पोलिसांनी राम यांचा भाऊ रमेश व मुलगा सत्येंद्र यांच्याकडे चौकशी केली असता त्यांनी सांगितले की, काजू बागायतीत सफाईसाठी जंगलात गेला असता राम यांच्यावर रानडुकराने हल्ला केला. त्यात ते गंभीर जखमी होऊन तेथेच निपचित पडले.

रात्री पावणेदहाच्या सुमारास राम याला कुटुंबीयांनी बाळ्ळी येथील प्राथामिक आरोग्य केंद्रात उपचारासाठी नेले असता तेथील डॉक्टरांनी त्यांना मृत घोषित केले.

या मृत्युप्रकरणी पोलिसांनी घातपाताचा संशय नाकारला आहे. अनैसर्गिक मृत्यू म्हणून कुंकळ्ळी पोलिसांनी हे प्रकरण नोंदवून घेतले आहे. पोलिस निरीक्षक डायगो ग्रासियस यांच्या मार्गदर्शनाखाली उपनिरीक्षक आदित्य सावंत पुढील तपास करत आहेत.