Goa Yellow Alert:राज्यात मागील चार-पाच दिवसांपासून पावसाचा जोर लक्षणीय प्रमाणात मंदावला आहे. पुढील चार दिवसांत राज्यातील काही भागांमध्ये मध्यम स्वरूपाच्या पावसाची शक्यता असल्याने गोवा वेधशाळेने यलो अलर्ट जारी केला आहे.

२६, २७, २८ आणि २९ ऑगस्ट या सलग चार दिवसांत जोरदार सरी कोसळण्याची शक्यता असल्याने या कालावधीत यलो अलर्ट जारी करण्यात आला आहे. हवामान खात्याने दिलेल्या माहितीनुसार, मागील २४ तासांत सरासरी ७ मिमी पावसाची नोंद झाली असून यावर्षी आतापर्यंत एकूण २५२५ मिमी म्हणजेच ९९.४१ इंच पावसाची नोंद झाली आहे.

यामुळे राज्यातील पावसाचे शतक पूर्ण होण्याच्या मार्गावर आहे. पाऊस शतकाच्या उंबरठ्यावर पोहोचला असून पुढील काही दिवसांतच हे लक्ष्य गाठले जाईल, अशी शक्यता आहे. दरम्यान, गेल्या २४ तासांत केपे, धारबांदोडा, पेडणे, फोंडा तसेच इतर भागात तुरळक पावसाची नोंद करण्यात आली आहे.

यलो अलर्टमुळे प्रशासनाने नागरिकांना सतर्क राहण्याचे आवाहन केले असून निचांकी भागात पाणी साचण्याची शक्यता लक्षात घेऊन आवश्यक ती काळजी घेण्याचा सल्ला दिला आहे.

राज्यातील पावसाची एकूण परिस्थिती आत्तापर्यंत समाधानकारक असून पुढील काही दिवसांत पावसाचे प्रमाण वाढण्याची शक्यता हवामान विभागाने वर्तवली आहे.