शिवोली: जनतेच्या सेवेसाठी लोकांनी आम्हांला पंचायत मंडळावर निवडणून दिलेले आहे त्यामुळे लोकमताचा आदर ठेवत प्रत्येकाने आपापल्या कामात सक्रीय असणे आवश्यक असल्याचे मत मार्ना- शिवोली पंचायतीवर उप-सरपंचपदी  निवड करण्यात आलेल्या विल्यम (William Fernandez) फर्नाडीस यांनी सांगितले. दरम्यान, माजी उप-सरपंच फ्रेडी फर्नाडीस यांनी अलिखीत करारानुसार महिन्याभरापूर्वीच आपल्या  पदाचा राजीनामा दिल्याने हे पद रिक्त झाले होते.

दरम्यान, बुधवारी सकाळी  बार्देश गट विकास कार्यालयातील अधिकारी मनोहर परवार (Manohar Parvar) यांच्या अध्यक्षतेखाली पंचायत कार्यालयात  घेण्यात आलेल्या एका विशेष बैठकीत विलीयम फर्नाडीस यांची उप-सरपंचपदी बिनविरोध निवड करण्यात आल्याचे निरीक्षक परवार यांनी  घोषीत केले. यावेळी सरपंच शर्मीला वेर्णेकर, पंच सदस्य सिल्वेस्टर फर्नाडीस, फेर्मीना फर्नाडीस, मोनाली पेडणेकर, विघ्नेश चोडणकर, अभय शिरोडकर, फ्रेडी फर्नाडीस तसेच विलीयम फर्नाडीस यांच्या  पत्नी स्टेफी विलीयम फर्नाडीस आणी हितचिंतक कार्यालयात  उपस्थित होते.

दरम्यान, शिवोली मतदार संघातील हणजुण -कायसुव पंचायतीच्या पाठोपाठ एकुण नऊ सदस्य संख्या असलेल्या मार्ना शिवोली पंचायतीचा ताबा शिवोलीचे विद्यमान आमदार विनोद पालयेंकर  यांच्याकडे आहे तथापि राज्यातील कर्फ्यू हटवताच पंचक्रोशीतील विकास कामांना पुन्हां चालना देण्यात येणार असल्याचे पालयेंकर यांनी त्यांची भेट घेतली असतां सांगितले.