डिचोली: आज ‘व्हडली दिवाळी’च्या दिवशी नळ कोरडे पडल्याने डिचोली शहरातील बोर्डे परिसरात पिण्याच्या पाण्याची तीव्र समस्या निर्माण झाली. सर्वत्र तुळशी विवाहाची ‘लगीनघाई’ सुरू असतानाच पाण्याची समस्या निर्माण झाल्याने बोर्डे येथील लोकांचे हाल झाले.

नळांना पाणी नसल्याने वडाचावाडा, मांद्रेकरवाडा, व्होडपान या भागातील लोकांची धांदल उडाली. गृहिणींचे तर अक्षरशः हाल झाले. ‘व्हडली दिवाळी’च्याच दिवशी पाण्यासाठी गृहिणींवर घागरी घेऊन घराबाहेर धावपळ करण्याची वेळ आली.

आज (१३ नोव्हेंबर) तुळशी विवाहाच्याच दिवशी पाण्याची गंभीर समस्या निर्माण झाल्याने बोर्डे भागात नाराजी पसरली.

नळांना पाणी नसल्याने लोकांची मोठी गैरसोय झाली, अशी कैफियत लक्ष्मण सावंत आणि इतरांनी मांडली.

यावर्षीही त्याच घटनेची पुनरावृत्ती...

१) काल (मंगळवारी) दपारी नळाद्वारे होणारा पाणीपुरवठा अचानक बंद झाला. आज (बुधवारी) सायंकाळपर्यंत नळ कोरडे राहिल्याने बोर्डे भागात पाण्याची गंभीर समस्या निर्माण झाली होती.

२) आज (बुधवार) सकाळी टँकरद्वारे बोर्डे भागात पाणी पुरवठा करण्यात आला. मात्र, पाणीपुरवठा मर्यादित करण्यात आल्याने तुळशी विवाहाची तयारी करण्यात लोकांना अनेक अडचणी आल्या.

३) गेल्या वर्षीही ‘व्हडली दिवाळी’च्याच दिवशी बोर्डे भागात पाण्याची समस्या निर्माण झाली होती. यंदा त्याची पुनरावृत्ती झाली आहे, अशी माहिती स्थानिक नगरसेवक ॲड. रंजना वायंगणकर यांनी दिली.