पणजी: राज्याच्या अंतर्गत जलवाहतूक खात्याच्यावतीने (नदी परिवहन) राज्यात लवकरच अंतर्गत जलगदतीने जलवाहतूक सुरू करण्यासाठी प्रयत्न सुरू आहेत. त्यासाठी या खात्याचे मंत्री सुभाष फळदेसाई आणि संचालक विक्रमसिंह राजेभोसले यांच्यासह अधिकारी केरळमधील ‘वॉटर मेट्रो’ची पाहणी करण्यासाठी गेले असून, सोमवारी त्यांन कोची वॉटर मेट्रोचे व्यवस्थापकीय संचालक लोकनाथ बेहरा यांच्याकडून या सेवेची माहिती जाणून घेतली.

याविषयी फळदेसाई यांनी सांगितले की, गोव्यात ९० किलोमीटर जलवाहतूक करण्यासाठी उपलब्धता आहे. केरळमध्ये वॉटर मेट्रो हा यशस्वी प्रकल्प सुरू झाला आहे आणि केंद्र सरकारच्या मान्यतेमुळे कोची रेल मेट्रोला हा प्रकल्प दिला गेला आहे.

गोवा हा जागतिक पर्यटनस्थळावर असल्याने अंतर्गत जलवाहतूक होणे आवश्यक आहे. सायंकाळी केंद्रीय बंदर, जहाजबांधणी आणि जलमार्ग मंत्री सर्वानंद सोनावाल यांच्याशी आपली भेट होणार असल्याचे फळदेसाई यांनी सांगितले.

राज्यातील जलमार्गाचा वापर झाल्यास सर्व बेटे जोडली जातील, त्याचबरोबर वाहतूक व्यवस्थेत मोठी सुधारणा होईल. जलमार्गाचा वापर झाल्यास रस्त्यावरील अपघात कमी होतील. त्याचबरोबर बेहरा यांच्याकडून माहिती मिळाली असून, ते प्रकल्प अहवालात गोव्याचाही समावेश करतील, अशी आशा आहे.