वाळपई: यंदा मोसमी पावसात ३१ टक्के घट झाल्याने त्याचे परिणाम दिसून येऊ लागले आहेत. सप्टेंबरमध्येच सत्तरी तालुक्यातील नद्यांनी तळ गाठला आहे. त्यामुळे राज्यात भीषण पाणीसंकटाचे सावट आतापासूनच घोंगावू लागले आहे. हीच स्थिती राहिली, तर यावर्षी राज्यात पाण्याची भीषण समस्या निर्माण होऊ शकते.

पेयजलाबरोबरच सिंचनावरही याचा परिणाम होणार आहे. त्यामुळे सामान्य नागरिकांबरोबरच शेतकरीही अडचणीत येण्याची शक्यता अधिक आहे. नोव्हेंबर महिन्यात साधारणपणे बागायती सिंचनाला प्रारंभ होत असतो. मे महिन्यापर्यंत सिंचनासाठी पाणी वापरले जाते. मात्र, आताच नद्यांनी तळ गाठल्याने शेतकरीही चिंतेत आहेत.

मार्च-मे दरम्यान राज्यात पाणीबाणी !

सत्तरीतील नद्यांमधील सध्याचा पाणीसाठा पाहता जानेवारीनंतर पाणी समस्या उद्भवू शकते. तसेच, मार्च-मे दरम्यान राज्याला भीषण पाणी संकटाचा सामना करावा लागू शकतो. प्रसंगी पाणीबाणी लागू करण्याची वेळ सरकारवर येऊ शकते, असे काही अधिकारी आतापासूनच सांगू लागले आहेत.

जानेवारीनंतर राज्यात भीषण संकट

सध्याची स्थिती कायम राहिल्यास जानेवारीनंतर राज्यात पेयजलाची गंभीर समस्या उद्भवू शकते. जलस्रोत खात्याने सप्टेंबरमध्येच नद्यांवरील बंधारे अडवले असले, तरी आताच नद्यांनी तळ गाठल्याने या बंधाऱ्यांत किती दिवस पाणी साठून राहील, याबाबत शंका आहे. कारण, सध्या पाऊस पूर्णपणे गायब झाला आहे. वातावरणात बदल होऊन प्रचंड गर्मी वाढली आहे. त्यामुळे नैसर्गिक जलस्रोतांमधील पाणी झपाट्याने घटत चालले आहे. याचे गंभीर परिणाम पेयजलपुरवठ्यावर होणार आहेत.