वास्को: वास्को शहरातील तानिया हॉटेलसमोरील रेल्वे मार्गावर रविवारी (२३ मार्च) एका अज्ञात इसमाचा मृतदेह आढळून आला. अंदाजे ३० ते ३५ वर्षे वयाच्या या इसमाचे धड व डोके शरीरापासून वेगळे झालं होतं. त्यामुळं हा अपघात आहे की आत्महत्या याबाबत स्पष्ट माहिती मिळू शकलेली नाही.

घटनास्थळी उपस्थित असलेल्या नागरिकांनी तत्काळ रेल्वे पोलिसांना या घटनेबाबच कळवलं. त्यानंतर पायलट राम विजय कुमार यांनी या घटनेची माहिती अधिकाऱ्यांना दिली. पोलिसांनी त्वरित घटनास्थळी धाव घेतली व पंचनामा करून मृतदेह ताब्यात घेतला. ओळख पटवण्यासाठी पोलिसांकडून चौकशी सुरू करण्यात आली आहे.

मृतदेह पुढील तपासणीसाठी दक्षिण गोवा जिल्हा इस्पितळात पाठवण्यात आला आहे. पोलिसांकडून या घटनेच्या सर्व बाजूंची तपासणी सुरू असून, आत्महत्या की घातपात याबाबत अधिक चौकशी केली जात आहे.

याप्रकरणी अधिक माहिती मिळवण्यासाठी पोलिस नागरिकांना मदतीचे आवाहन करत आहेत. संबंधित व्यक्तीबाबत कोणालाही माहिती असल्यास त्यांनी तातडीने स्थानिक पोलिस ठाण्याशी संपर्क साधावा, असे आवाहन करण्यात आले आहे.