Goa Budget Session: अर्थसंकल्पीय अधिवेशन! सरकारला कोंडीत पकडण्यासाठी विरोधकांची कसोटी; 3 दुरुस्ती विधेयके होणार सादर

Goa Assembly Budget Session 2025

पणजी: विधानसभेच्या तीन दिवसीय अर्थसंकल्पीय अधिवेशनास उद्या, सोमवारी (ता. २४) सुरुवात होणार आहे. अधिवेशनाच्या पहिल्याच दिवशी विरोधकांकडे मागील १५ दिवसांत राज्यासह देशभरात खळबळ उडवून देणारे सनसनाटी विषय असून सरकारला घेरण्यासाठी त्यांनी रणनीती आखली आहे.

सर्वांत महत्त्वाचे म्हणजे ‘गोमन्तक’ने वाचा फोडलेला गोवा विद्यापीठातील पेपर चोरी प्रकरणाचा विषय सत्ताधाऱ्यांना अडचणीत आणणारा ठरू शकतो; परंतु गत अधिवेशनाप्रमाणे विरोधक विस्कळीत राहणार की संघटित, हे या तीन दिवसांत दिसून येईल. २६ रोजी मुख्यमंत्री डॉ. प्रमोद सावंत हे २०२५-२०२६ चा राज्याचा अर्थसंकल्प सादर करणार आहेत.

आतापर्यंत बहुमताच्या जोरावर सत्ताधारी विरोधकांचा आवाज दाबत असल्याचा आरोप विरोधक करीत आहेत. त्यामुळे पहिल्या दिवशीच विरोधक किती आक्रमक राहतात, हे दिसून येईल. सरकारला कोंडीत पकडण्यासाठी विरोधकांची कसोटी लागणार आहे.

या अधिवेशनात विधानसभा सदस्यांकडून १८० तारांकित आणि ५४८ अतारांकित प्रश्न विचारले जाणार आहेत. विधानसभेचा तीन दिवसांचा कालावधी ठेवल्याने अगोदरच विरोधकांकडून नाराजी व्यक्त केली आहे. यापूर्वीही हिवाळी अधिवेशन तीन दिवसांचेच होते. त्यामुळे विरोधकांनी कामकाजाला कमी कालावधी दिल्याने स्पष्टपणे नाराजी व्यक्त केली होती.

विरोधकांचा आवाज दाबला जातोय

सरकारला लोकशाही मार्गाने कामकाज चाललेले नको वाटते. इतर सर्व राज्यांत विरोधकांचे म्हणणे सत्ताधारी ऐकून घेतात, तेथील सभापतीही त्यांना त्यांची बाजू मांडण्यासाठी वेळ देतात. विधानसभेच्या कामकाज सल्लागार समितीने (बीएसी) केलेल्या मागणीनुसार सभापतींनी विरोधकांना वेळ देणे आवश्यक आहे. आम्ही केवळ सातजण आहोत; पण तेही भारी पडत असल्याने आमचा आवाज दाबला जातो, अशी प्रतिक्रिया युरी आलेमाव यांनी व्यक्त केली आहे.

...हे विषय ठरणार वादळी

मडगावातील कथित सामूहिक बलात्कार प्रकरण, श्री खाप्रेश्वर स्थलांतर, म्हादई, टीसीपी कायदा १७ (२) हे विषयही विरोधकांना आयते कोलीत देणारे ठरले आहेत. त्यामुळे अर्थसंकल्पीय अधिवेशन वादळी ठरण्याची शक्यता नाकारता येत नाही.

आज तीन दुरुस्ती विधेयके

सोमवारी सरकारतर्फे तीन दुरुस्ती विधेयके सादर होणार आहेत. पहिल्या दिवशी प्रश्नोत्तराच्या सत्रानंतर दिवंगतांना सभागृहात श्रद्धांजली वाहण्यात येईल. त्यात माजी आमदार लवू मामलेदार, गोमंत विभूषण पुरस्काराने सन्मानित स्व. प्रभाकर कारेकर, अयोध्येतील राम मंदिराचे प्रमुख पुजारी आचार्य सत्येंद्र दास यांचा समावेश आहे.

या महत्त्वाच्या विषयांवरही खल

१. मुख्यमंत्री डॉ. प्रमोद सावंत हे गोवा राज्य संशोधन फाऊंडेशन दुरुस्ती विधेयक, खासगी विद्यापीठ दुरुस्ती विधेयक सभागृहात सादर करतील.

२. रोजगार आणि कामगार मंत्री बाबूश मोन्सेरात हे रोजगार विनिमय (खासगी नोकरींची अधिसूचना) दुरुस्ती विधेयक २०२५ सादर करतील.

३. खासगी कंपन्यांनी रोजगार विनिमय केंद्राला भरतीसाठी असलेल्या रिक्त जागांची माहिती न दिल्यास दंडाची तरतूद या विधेयकात आहे.

४. अधिवेशनाच्या पहिल्या दोन दिवसांत दुपारच्या भोजनानंतर राज्यपालांच्या अभिभाषणावर चर्चा होईल.