वास्को: दहा लाख रुपये रोख व पाच तोळे सोने दिल्याशिवाय लग्न होणार नाही, असे ऐनवेळी सांगणारा नवरा मुलगा आणि त्याच्या आई-वडिलांच्या विरोधात वास्को पोलिसांनी हुंडाविरोधी कायद्याखाली गुन्हा नोंद केला आहे. याप्रकरणी लवकरच नोटीस काढून त्यांची चौकशी करण्यात येणार असल्याचे सांगण्यात आले. मुलीच्या वडिलांनी वास्को पोलिस ठाण्यात ही तक्रार नोंदविली आहे.

पोलिसांनी दिलेल्या माहितीनुसार, मांगोरहिल येथे राहणाऱ्या एका मुलीचे लग्न चिंबल येथील युवकाशी होणार होते. या लग्नाच्या बोलणीप्रसंगी हुंड्याविषयी कोणतीही चर्चा झाली नव्हती. मात्र, २९ एप्रिलला नवरा मुलगा आणि त्याच्या आई-वडिलांनी मुलीच्या वडिलांकडे दहा लाख रुपये रोख व पाच तोळे सोने हुंड्याची मागणी केली. ऐनवेळी हुंडा मागितल्यामुळे मुलीच्या आई-वडिलांसमोर प्रश्नचिन्ह निर्माण झाले. ही मागणी पूर्ण झाल्याशिवाय लग्न होणार नसल्याची धमकीही दिली.

मुलीच्या (Girl) वडिलांसह इतरांनीही त्यांना समजावण्याचा प्रयत्न केला. मात्र, वराकडील मंडळींनी हुंड्याचा हट्टच धरला. त्यामुळे मुलीच्या वडिलांनी वास्को पोलिस ठाण्यात तक्रार नोंदविली. याप्रकरणी वास्को पोलिसांनी हुंडा प्रतिबंधक कायदा कलम ४ तसेच इतर कलमांखाली गुन्हा नोंद केला आहे. याप्रकरणी पोलिस उपनिरीक्षक डेव्हिड कॉस्ता अधिक चौकशी करीत आहेत.