Goa Crime Case: गोव्यात अपघातांसोबतच गुन्हेगारी वाढली असल्याचे वेळोवेळी दिसून आलेय. एकाच रात्रीत तब्बल सहा घरे फोडून लाखो रुपयांचा ऐवज चोरट्यांनी पळवल्याची धक्कादायक घटना समोर आल्यावर गोव्यातील गुन्हेगारीची तीव्रता समजून येतेय.

या चोरीप्रकरणी मिळालेल्या माहितीनुसार आल्त-दाबोळीतील एकता वाड्यावर गुरुवारी रात्रीच्या सुमारास ही घरफोडीची घटना घडली आहे.

या घरफोडीप्रकरणी मिळालेल्या माहितीनुसार या वाड्यावर साधारणतः 17 घरे दाटीवाटीने उभारलेली आहेत. या घरांपैकी जी घरे बंद होती, तीच चोरट्यांनी फोडली आहेत.

काही दिवसांपासून या भागात एक भिकारी फिरत असून कित्येकवेळा तो भिकारी दुपारच्यावेळी दारावर बसून भीक मागण्यासाठी हटून बसायचा असे येथील स्थानिकांनी सांगितले. त्यामुळे या घरफोडीमागे त्याचाच हात असल्याचा दाट संशयही त्यांनी व्यक्त केलाय.

या घरफोडीमध्ये एका घरातून 7 लाख रुपये किमतीचे सोने आणि रोकड चोरीला गेल्याचे आढळून आले तर इतर घरांतून किरकोळ वस्तू चोरीला गेल्या आहेत.

घराच्या मुख्य दरवाजांच्या कड्या तोडून चोरट्यांनी कपाटे फोडून जे मिळेल ते किमती अलंकार घेऊन पलायन केल्याचे आढळून आले आहे. मध्यरात्री 12 वाजेपर्यंत वाड्यावरील रहिवासी जागे असतात.

त्यामुळे ही चोरी पहाटे 2 ते 4 याच कालावधीत करण्यात आली असावी, असेही त्यांचे म्हणणे आहे. दरम्यान, या घरफोडीचा तपास वास्को पोलीस करत आहेत.