Mauvin Godinho: पर्यटन स्थळासाठी देशी-विदेशी पर्यटकांची गोव्याला पसंती आहे. यामुळे हवाई प्रवाशांची संख्या दिवसेंदिवस वाढणार असल्याने दोन विमानतळांची गरज आहे. प्रवाशांची संख्या लक्षात घेता पुढील वीस वर्षांत कदाचित तिसऱ्या विमानतळाची गरज भासण्याची शक्यता नाकारता येत नाही, असे प्रतिपादन पंचायत मंत्री माविन गुदिन्हो यांनी केले.

उच्च दाबाच्या वीजवाहिन्यांचे विद्युत वाहक (कंडक्टर्स) बदलून त्याजागी उच्च क्षमतेचे नवीन विद्युत वाहक बसविण्याच्या कामाला मंत्री गुदिन्हो यांच्या हस्ते आज प्रारंभ करण्यात आला. यावेळी त्यांनी दाबोळी विमानतळ बंद होणार असल्याचे सांगून लोकांची दिशाभूल करणाऱ्यांना त्यांनी लक्ष्य केले.

याप्रसंगी वास्कोचे आमदार कृष्णा (दाजी) साळकर, चिखलीचे सरपंच कमलाप्रसाद यादव व इतर मान्यवर उपस्थित होते. नवीन व उच्च क्षमतेचे विद्युत वाहक हे वेर्णा उपस्थानक ते सांकवाळ उपस्थानक, तेथून कंदब बसस्थानक वास्को उपस्थानकापर्यंत बदलण्यात येणार आहेत.

यामुळे विद्युत प्रवाह खंडित होण्याचे प्रकार कमी होतील, अशी माहिती गुदिन्हो यांनी दिली. दरम्यान, दाबोळी विमानतळ ते वेर्णा असा नवीन उड्डाणपूल बांधण्यात येणार असून, वाहतूक सुरळीत करण्यासाठी पुढील तीन महिन्यांत 550 कोटी रुपये खर्चून अंडरपास तयार केला जाईल, अशी माहिती गुदिन्हो यांनी नुकतीच दिली होती.

‘मोपा’चा प्रवास महागडा!

येणाऱ्या काळात हवाई प्रवाशांची संख्या वाढणार आहे. त्यामुळे दाबोळी विमानतळाची गरज असेल. ‘दाबोळी’ हे जुने व भारतीय विमानतळ प्राधिकरणाचे आहे. तर मोपा विमानतळ एका खासगी कंपनीचे आहे.

विमानांसाठी लागणारे इंधन मुरगावातून ‘मोपा’पर्यंत वाहिन्यातून किंवा टँकरमधून न्यावे लागणार आहे. त्यामुळे इंधनाचा खर्च वाढेल. जेणेकरून ते स्वस्त दरात हवाई सेवा पुरवू शकणार नसल्याचे त्यांनी मंत्री गुदिन्हो यांनी स्पष्ट केले.

"दाबोळी विमानतळ बंद होणार नाही. जर ते बंद करायचे होते, तर आम्ही ‘दाबोळी’वर सुमारे 1300 कोटी रुपये खर्च केले असते काय? काहीजण चांगल्या गोष्टींना नाहक विरोध करून लोकांची दिशाभूल करत आहेत."

- माविन गुदिन्हो, मंत्री