Goa University: गोवा विद्यापीठातील प्राध्यापक तथा विद्यार्थी निवडणूक समितीचे अध्यक्षांना व त्यांच्या सहकाऱ्यांना विद्यापीठातील काही विदयार्थ्यानी गुंडागिरी करीत धमकी देण्यात आल्याचा प्रकार समोर आला होता.

दरम्यान गुंडागिरी करणाऱ्या विद्यार्थ्यांच्या विरोधात पोलिसांत तक्रार करुनही कोणतीच कारवाई झाली नाही.

त्यामुळे विद्यापीठातील शिक्षकांनी सोमवारी विद्यापीठ परिसरात एकत्र येत शिक्षक संघटनेच्यावतीने घटनेचा निषेध नोंदवला. तसेच निवडणूकीवर बहिष्कार टाकण्याचा एल्गारही केला.

गुंडागर्दी करणाऱ्या या विद्यार्थ्यांवर त्‍वरित कारवाई केली नाही तर विद्यापीठ निवडणूक प्रक्रियेवर शिक्षक संघटना बहिष्कार टाकेल, असा इशारा गोवा विद्यापीठ प्राध्यापक संघटनेचे अध्यक्ष प्रा. रामराव वाघ यांनी दिला.

"विद्यापीठ प्रशासनाकडे वारंवार तक्रार करून देखील या विद्यार्थ्यांवर कारवाई केली जात नाही. कारवाई करण्यापासून विद्यापीठाला कोण रोखत आहे? कोणाकडून दबाव आणला जात आहे? असे सवाल प्रा. वाघ यांनी उपस्‍थित केले.

गोवा युनिव्हर्सिटी टीचर्स असोसिएशनने (गुटा) आज विद्यापीठ परिसरात निदर्शने करून शिरीष परब आणि त्याच्या दोन साथीदारांवर विद्यार्थी संघटनांच्या निवडणुकीत अडथळा आणल्याबद्दल आणि धमकावल्याप्रकरणी कारवाई करावी, अशी मागणी केली.

विद्यापीठाच्या कॅम्पसमध्ये या तिघांनी वारंवार केलेल्या गुंडगिरीचा निषेध करणाऱ्या निवेदनावर मोठ्या संख्येने विद्यापीठाच्या शिक्षकांनी स्वाक्षऱ्या केल्‍या.

गुंडांना राजकीय आशीर्वाद?

शिरीष परब आणि त्‍याच्‍या साथीदारांची दादागिरी वाढत चालली आहे. आता तर त्‍यांनी विद्यार्थी कल्याण आणि सांस्कृतिक कार्य संचालनालयाच्या कार्यालयात घुसून कर्मचाऱ्यांना धमकावले आहे.

याबाबत अधिकाऱ्यांकडे वारंवार तक्रारी करूनही या विद्यार्थ्यांवर कोणतीही कारवाई केली जात नाही. राजकीय आशीर्वादाशिवाय हे शक्‍य नाही, असा आरोप गोवा विद्यापीठ प्राध्यापक संघटनेचे अध्यक्ष प्रा. रामराव वाघ यांनी केला.

दरम्यान, एनएसयूआयच्या नेत्यांनी आरोप केला आहे की, हे तिन्‍ही विद्यार्थी अखिल भारतीय विद्यार्थी परिषदेशी संलग्न आहेत.