पणजी: गोवा विद्यापीठ विद्यार्थी मंडळाच्या निवडणुकीत टुगेदर फॉर युनिव्हर्सिटी आणि युनायटेड युनिव्हर्सिटी असे दोन प्रमुख गट आमनेसामने ठाकले होते या निवडणुकीत युनायटेड युनिव्हर्सिटी गट पहिल्यांदाच निवडणुकीत उतरला होता. या गटाने मागील अनेक वर्षे विद्यापीठाचा गड राखलेल्या ‘टुगेदर फॉर युनिवर्सिटी’ ला धक्का दिला असून संपूर्ण प्रमुख पॅनल युनायटेड युनिव्हर्सिटीचे निवडून आले आहे.

गोवा विद्यापीठ विद्यार्थी मंडळाच्या अध्यक्षपदी ऋतिक मांद्रेकर निवडून आले आहेत. टुगेदर फॉर युनिव्हर्सिटी मागील काही वर्षांपासून गोवा विद्यापीठ विद्यार्थी मंडळात आपले स्थान अबाधित राखून होते परंतु यंदा पहिल्यांदाच युनायटेड युनिव्हर्सिटी गट निवडणूक लढवत निवडणुकीत बाजी मारली. जुनी संघटना गड राखण्यात अपयशी ठरली असून युनायटेडने यश मिळवले.

‘एनएसयूआय’ मुख्य निवडणुकीतच उतरणार

मागील काही निवडणुकांमध्ये एनएसयूआय गोवा विद्यापीठ निवडणुकांमध्ये भाग घ्यायचा. परंतु यंदा मुख्य निवडणुकीतच उमेदवार उतरविण्याचा निर्णय घेतला असल्याचे एनएसयूआय पदाधिकाऱ्याने सांगितले. अभाविप गोवा विद्यापीठ विद्यार्थी मंडळाच्या निवडणुकीत मागील काही वर्षे सहभागी झालेली नाही. केवळ मुख्य निवडणुकीत उमेदवार उतरवत आली आहे.

विद्यार्थी मंडळ असे; गोवा विद्यापीठ विद्यार्थी मंडळ अध्यक्षपदी ऋतिक मांद्रेकर, क्रीडा आणि सांस्कृतिक प्रतिनिधी- अथर्व पेडणेकर, सचिव-सर्वेश सातस्कर, महिला प्रतिनिधी -सिया कळंगुटकर हे निवडून आले आहेत.