पणजी: गोवा विद्यापीठाच्या सर्व संलग्न महाविद्यालयांमध्ये सत्र १ ते ४ पर्यंतचे कितीही विषय उत्तीर्ण न झालेल्या विद्यार्थ्यांना पाचव्या सत्रात प्रवेश देण्याचा निर्णय गोवा विद्यापीठाने रद्दबादल केला होता. त्यामुळे यंदा पाचव्या सत्रात हजारो विद्यार्थ्यांना प्रवेश घेता आला नाही हा निर्णय गोवा विद्यापीठाने मागे घेतला आहे.

पहिल्या ते चौथ्या सत्रापर्यंतचे कितीही विषय अनुतीर्ण असले तरी त्या विद्यार्थ्यांना गोवा विद्यापीठाशी संलग्न महाविद्यालयांनी पाचव्या सत्रात प्रवेश द्यावा, असे परिपत्रक गोवा विद्यापीठाचे कुलसचिव प्रा. सुंदर धुरी यांनी आज जारी केले आहे. कोरोना काळात पहिल्या सत्रापासून चौथ्या सत्रापर्यंत काही विषय अनुतीर्ण असलेल्या विद्यार्थ्यांना देखील पाचव्या सत्रात प्रवेश दिला जायचा हा निर्णय यंदा मागे घेण्यात आला होता.

परंतु हा निर्णय मागे घेतल्याची कल्पना विद्यार्थ्यांना देण्यात आली नसल्याचे सांगत गोवा विद्यापीठाचे कुलगुरु प्रो. हरिलाल मेनन आणि मुख्यमंत्री डॉ. प्रमोद सावंत यांना निवेदन देण्यात आले होते. याविषयी तोडगा काढण्याचे आश्‍वासन कुलगुरुंनी विद्यार्थ्यांना दिले होते.

मुख्यमंत्री डॉ.सावंत यांनी या विषयाबाबत पाठपुरावा करत विद्यार्थ्यांना न्याय दिल्याचे सरकारी महाविद्यालयाचे माजी सरचिटणीस अमेय किंजवडेकर यांनी सांगितले. तसेच ‘अभाविप’चे संयोजक शुभम मळीक म्हणाले, आम्ही या प्रश्‍नी यापूर्वी विद्यापीठाला निवेदन दिले होते. विद्यापीठाने हा निर्णय घेऊन हजारो विद्यार्थ्यांना न्याय दिला असल्याचे त्यांनी सांगितले.

महाविद्यालयांनी प्रवेश द्यावा!

ज्या विद्यार्थ्यांचे विषय अनुत्तीर्ण झाल्यामुळे प्रवेश नाकरण्यात आला होता, त्यांना आता प्रवेश देण्यात येणार आहे. पाचव्या सत्रात ज्या विद्यार्थ्यांना प्रवेश घ्यायचा आहे, त्यांना प्रवेशाची अंतिम तारीख २६ जुलै आहे. त्यामुळे पाचव्या सत्रात प्रवेश घेऊ इच्छिणाऱ्यांना महाविद्यालयांनी प्रवेश द्यावा, असे निर्देश परिपत्रकातून देण्यात आले आहेत.