पणजी: गोवा राज्यात भाड्याने टॅक्सी देणाऱ्या व्यावसायिकांवर परिवहन विभागाकडून मोठी कारवाई केली जाणार आहे. समोर आलेल्या माहितीनुसार परवानगी नसलेल्या ठिकाणी टॅक्सी स्टँड्स उभारल्यास कठोर कारवाई करण्याचा इशारा विभागाने दिला आहे. विमानतळ, रेल्वे स्टेशन यांसारख्या सार्वजनिक ठिकाणी अनेक टॅक्सी चालक प्रवाशांना सेवा देतात पण त्यांच्याकडे आवश्यक परवानगी नसते, यामुळे नियमांचे उल्लंघन होते, असे परिवहन विभागाने म्हटले आहे.

वर्ष १९८९ मध्ये जारी केलेल्या कायद्याच्या नुसार रेंट अ कॅब योजनेअंतर्गत काही नियम आणि अटी लागू करण्यात आल्या होत्या. त्यानुसार, टॅक्सी चालकांना त्यांचा व्यवसाय परवान्यात नमूद केलेल्या ठिकाणीच ठेवणं भाग आहे.

परिवहन विभागाची परवानगी घेतल्याशिवाय दुसरीकडे हा व्यवसाय सुरु करता येत नाही आणि या कायद्यानुसार आता नियमांचे उल्लंघन झाल्यास टॅक्सी चालकांचा परवाना रद्द होऊ शकतो, असा स्पष्ट इशारा विभागाने दिला आहे.

विमानतळ किंवा रेल्वे स्थानकांवर अनेक टॅक्सी चालक परवानग्या नसताना व्यवसाय करत असल्याचे निदर्शनास आले आहे. यामुळे प्रवाशांना मनमानी भाड्याचा सामना करावा लागतो, तसेच अनेक वेळा प्रवाशांची गैरसोय होते, यावर नियंत्रण ठेवण्यासाठी परिवहन विभागाने ही कठोर भूमिका घेतली आहे.

भाड्याने टॅक्सी चालवण्यासाठी केंद्र सरकारच्या मोटार वाहन नियम १९८९ अंतर्गत परवानगी घ्यावी लागते. हा परवाना मिळवण्यासाठी ऑपरेटर किंवा असोसिएशनकडे किमान ५० मोटार कॅब असणे आवश्यक आहे. सध्या गोवा सरकारकडून असे ५,९७२ परवाने देण्यात आले आहेत. तरीही अनेक चालक नियमबाह्य पद्धतीने व्यवसाय करत असल्याने सरकारने कठोर भूमिका घेतली असल्याचे दिसते.