Goa Traffic Authority Suspends New Rent-a-Cab Permits for Road Safety

पणजी: गोव्यात रस्ते सुरक्षा, वाहतूक कोंडी आणि कायद्याच्या पालनाच्या दृष्टीने राज्य वाहतूक प्राधिकरणाने (एसटीए) मोठा निर्णय घेतला आहे. रेंट-अ-कॅब योजना 1989 अंतर्गत पुढील सूचनेपर्यंत कोणताही नवीन रेंट-अ-कॅब परवाना किंवा परवानगी जारी केली जाणार नाही, अशी माहिती वाहतूक संचालनालयाने दिली आहे.

गोमंतकीयांनी सहकार्य करावे

दरम्यान, हा निर्णय रस्ता सुरक्षा, वाहतूक नियंत्रण आणि कायद्याचे पालन यांना प्राधान्य देत घेण्यात आला आहे. नागरिकांनी या निर्णयाचे पालन करुन सहकार्य करावे, असे आवाहन करण्यात आले आहे.

अपघातांमध्ये वाढ

भाडेपट्टीवर उपलब्ध असलेल्या दुचाकी/चारचाकी वाहने स्वतः चालवताना होणाऱ्या अपघातांमध्ये वाढ झाली आहे. पर्यटकांकडून (Tourists) निष्काळजीपणे आणि मद्याच्या प्रभावाखाली वाहन चालविण्याची अनेक प्रकरणे समोर आली आहेत. यामुळे गंभीर अपघात आणि जखमा होण्याच्या घटना वाढल्या आहेत असे वाहतूक संचालनालयाच्या निदर्शनास आल्याने हा निर्णय घेण्यात आला. एसटीएच्या निर्णयानुसार, नागरिकांना रेंट-अ-कॅब परवाना किंवा परवानगीसाठी कोणताही नवीन अर्ज न करण्याचा सल्ला देण्यात आला आहे.