पणजी : गोव्यात आम आदमी पक्षाने विधानसभा निवडणुकीत आपलं खातं खोललं आहे. गोव्यात आपला दोन जागांवर विजय मिळाला आहे, तर तीन ठिकाणी आपला आघाडी दिसत होती. अरविंद केजरीवालांनी या निकालांवर पहिल्यांदाच भाष्य केलं आहे. गोव्यात प्रामाणिक राजकारणाची सुरुवात होते आहे, असं वक्तव्य केजरीवालांनी केलं आहे. केजरीवालांनी ट्विट केलं आहे की, आपने गोव्यात दोन जाहा जिंकल्या आहेत. कॅप्टन वेंझी आणि एर क्रूझ यांचं अभिनंदन आणि शुभेच्छा. ही गोव्यात प्रामाणिक राजकारणाची सुरुवात आहे.

दरम्यान आपच्या नेत्या आतिशी यांना बाणावली आणि वेळ्ळीमध्ये वेंझी व्हीएगस आणि क्रूझ सिल्वा यांनी विजय मिळवत आपला गोव्याच्या राजकारणात प्रवेश मिळवून दिला आहे. आतिशी यांनीही ट्विट करत दोन्ही उमेदवारांचं अभिनंदन केलं आहे. वेंझी व्हिएगस यांनी तृणमूल काँग्रेसच्या (TMC) चर्चिल आलेमाव आणि काँग्रेसच्या (Congress) अंतोनिओ डायस यांच्यासमोर तगडं आव्हान उभं केलं होतं. चर्चिल आलेमाव यांना 5140 मतं मिळाली तर डायस यांना 4697 मतांवर समाधान मानावं लागलं आहे. वेंझी व्हिएगस यांना 6411 मतं मिळाली असून ते 1271 मतांच्या फरकाने निवडून आले आहेत.

गोव्यात आपचे (Aam Aadmi Party) मुख्यंमंत्रीपदाचे उमेदवार अमित पालेकर यांना मात्र पराभवाचा सामना करावा लागला आहे. आम आदमी पक्षाचं भंडारी समाजाचं व्होट कार्ड कामी आलं नसल्याचं चित्र आहे. भंडारी समाजाचे उमेदवार देऊनही त्यांना गोव्यात म्हणावं तसं यश आलं नाही. मात्र पंजाबमध्ये मात्र आपने काँग्रेससह भाजपचा सुपडासाफ केला आहे. आम आदमी पक्षाचे भगवंत मान 16 मार्च रोजी पंजाबच्या मुख्यमंत्रीपदाची शपथ घेणार आहेत. अरविंद केजरीवाल (Arvind Kejriwal) आणि भगवंत मान यांचा 16 मार्चला अमृतसरमध्ये रोड शो होणार आहे. मान यांनी अरविंद केजरीवाल यांना शपथविधीसाठी आमंत्रित केले आहे.